Яке аз ҷавондухтарони парчамбардори кишвар дар риштаи гӯштини ҷудо ғолиби чандин мусобиқаҳои ҷумҳуриявию ҷаҳонӣ, узви дастаи мунтахаби Тоҷикистон оид ба ҷудо, мураббии варзиш оид ба омодасозии ҷавондухтарон дар самти ҷудо Шоҳида Қаландарова мебошад.

Шоҳида 22 сол дошта, зодаи деҳаи Қурбоншаҳиди ноҳияи Восеъ аст. Ӯ фаъолияти хешро рӯи ҷодаи варзиш аз овони наврасӣ дар мусобиқаҳои наврӯзии деҳот ва ноҳия шурӯъ менамояд. Ҳарифони ӯ дар ин сабқатҳо бештар писарон буданд ва ин духтари ҷасур бо ҷасорату матонати худ ҳамеша ғолиб меомад.

“Мо дар оила панҷ фарзанд буда, чор нафар духтарем. Дар байни хоҳарон аз хурдсолӣ бо хислатҳои писаронаам фарқ мекардам. Ҳамин буд, ки бештар бо бачаҳо дӯстӣ мекардаму аксар бозиву машқҳои варзиширо бо онҳо иҷро менамудам”,- изҳор медорад, ӯ.

Ҳар як инсон ба худ мақсад мегузорад, то дар зиндагӣ як нафари фаъол бошаду дар ҷомеа саҳмгузор. Шоҳида низ дар пеши худ мақсад гузошт, то яке аз чунин фаъолон дар соҳаи варзиш бошад. Ҳамин мақсади дар пеши худ гузоштаву умеди волидон буд, ки ӯ ҳаёти худро ба варзиш бахшад.

Шоҳида аз 14-солагӣ тамрини варзи¬шии худро дар мактаби варзишии ба номи Иброҳим Ҳасанов оғоз намуда, пас аз чор соли тамрин соли 2017 ба Донишкадаи тарбияи ҷисмонии Тоҷикистон ба номи С. Раҳимов дохил гардид. Тӯли чор сол аст, ки зери роҳбарии устоди варзиш оид ба гӯштини ҷудо Рисқиддин Раҷабов машқу тамрин менамояд.

Бояд зикр кард, ки дар тӯли фаъолияти пурсамари худ Шоҳида дар чанд мусобиқаҳои ҷумҳуриявӣ ва байналмилалӣ иштирок намуда, ба дастовардҳои зиёде ноил гардидааст.

“Соли 2014 дар мусобиқаи қаҳрамонии самбои ҷаҳон миёни наврасон, ки дар шаҳри Лимассоли Кипр баргузор гардид, иштирок намуда, медали биринҷии мусобиқаро ба даст овардам ва аз ҳамон вақт дастовардҳои ман оғоз гардид”, - мегӯяд, Шоҳида.

Ӯ пасон фаъолияти худро дар самти ҷудо идома дода, 4 маротиба дар мусобиқаи байналмилалии Ҷоми Осиё, ки дар ҷумҳуриҳои Ӯзбекистон ва Қирғизистон баргузор гардид, тавонист соҳиби медали тилло шавад.
Шоҳида инчунин намояндаи Тоҷикистон дар бозиҳои тобистонаи Осиё соли 2018 дар Индонезия ва қаҳрамони Тоҷикистон оид ба ҷудо дар соли 2020 мебошад. Ӯ бори дуввум дар мусобиқаи ҷумҳуриявӣ оид ба гӯштини ҷудо байни калонсолон, ки рӯзҳои 30-31 ян¬вари соли ҷорӣ дар мактаби ҷумҳуриявии тайёрии олимпии дастаҳои мунтахаб, воқеъ дар шаҳри Душанбе баргузор гардид, дар вазни то 70 кило ширкат варзида, миёни бо¬нувон сазовори ҷойи аввал гардид.

“Барои ба чунин дастовардҳо ноил гар¬диданам, пеш аз ҳама саҳми волидон, устодон ва дастгириҳои Ҳукумати кишвар хеле назаррас аст ва ман хеле хушҳолам, ки дар чунин фазои озоду обод умр ба сар меба¬рам”, - бо ифтихор мегӯяд, Шоҳида.

Ӯ дар дастаи мунтахаби ҷудои кишвар ҳамчун “Устоди варзиши Ҷумҳурии Тоҷикистон” оид ба гӯштини ҷудо ҷавондухтаронро ба риштаи ҷудо ҷалб ва нозукиҳои ин намуди варзишро меомӯзонад.

Шоҳида ҳамакнун ба мусобиқоти байналмилалии пеш аз бозиҳои олимпӣ, ки аз 5 то 7-уми марти соли ҷорӣ дар шаҳри Тошканди Ӯзбекистон баргузор мешавад, омодагӣ мебинад ва орзу дорад, ки дар ин мусобиқа ғолиб омада, роҳхат ба Бозиҳои олимпии Токио-2021-ро соҳиб мешавад. Ӯ дар ҷодаи варзиш ба муштзани маъруфи тоҷик Мавзуна Чориева пайравӣ дорад ва мехоҳад мисли ӯ дар мусобиқаҳои ҷаҳонӣ пирӯз гардида, парчами кишварамонро баланд бардорад.

Умед дорем, ки ӯ ба орзуҳояш мерасад. Дар ин ҷода барояш барору комёбӣ ва пирӯзиву муваффақиятҳо хоҳонем.

Исфандиёр АМАКҶОНОВ, "ҶТ"