Дар даври аввали мусобиқаи байналмилалии ҷудо “Ulaanbaatar Grand Slam-2023”, ки имрӯз дар пойтахти Муғулистон шуруъ гардид, се варзишгари тоҷик - Муҳаммадсолеҳ Қувватов (-60 кило), Меҳрзод Суфиев (-60 кило) ва Обид Ҷебов (-66 кило) пирӯзӣ ба даст оварда, ба марҳилаи баъдӣ роҳхат гирифтанд.

Муҳаммадсолеҳ Қувватов бо 2 вазари Неил Макдоналди бритониро мағлуб карда, дар даври дигар бо Ариунболд Энхтайвани мизбон (Муғулистон) болои татами мебароянд. Меҳрзод Суфиев низ дар даври аввал варзишгари фаронсавӣ Боуда Ромарикро бо 2 имтиёзи вазари шикаст дода, ба даври дуюм баромад. Дар даври дуюм ӯ бо Рюҷу Нагайама аз Ҷопон гӯштин мегирад.

Обид Ҷебов ҳам бо ғалаба мусобиқаи мазкурро оғоз намуд. Ӯ дар даври аввал Ченг Йен-Минг аз Тайпеи Чинро бо 2 имтиёзи вазари мағлуб кард. Дар даври дуюм бо Каромат Ҳусейнов аз Озарбойҷон вориди майдон шуда, ӯро низ мағлуб намуд ва роҳашро ба даври сеюм ҳамвор сохт.

Я. МАҲМАДНАБИЕВ, “ҶТ”