Дар шаҳри Душанбе, санаи 16 март, бахшида ба иди Наврӯзи байналмилалӣ Дави наврӯзӣ ва Марафони велосипедронӣ баргузор мегардад.

Дав ва Марафони велосипедронӣ, бо иқдоми Кумитаи кор бо ҷавонон ва варзиш ва дастгирии мақомоти иҷроияи ҳокимияти давлатии шаҳри Душанбе дар ҳамкорӣ бо Кумитаи миллии олимпии Тоҷикистон доир мешавад.

Дар ин бобат қарори Раиси шаҳри Душанбе Рустами Эмомалӣ тасдиқ шуд.

Тавре дар қарор омадааст, чорабиниҳои варзишии мазкур бо мақсади иҷрои дастури Роҳбари Дастгоҳи иҷроияи Президенти Ҷумҳурии Тоҷикистон ҷиҳати таҷлили иди байналмилалии Наврӯз, таъмини оммавияти тарбияи ҷисмонӣ ва варзиш, ташвиқу тарғиби ҳаёти солим доир мегардад.

Марафони велосипедронӣ аз соати 8:00 то 9:00 ва Дави наврӯзӣ аз соати 9:00 то 10:00 дар масири маҳаллаи Чорбоғ то Наврӯзгоҳ идома меёбад.