Шоми дирӯз 12 май дар гурӯҳи “I”-и қитъаи Осиё бозиҳои интихобии даври сеюми марҳилаи 8-уми Чемпионати ҷаҳон- 2018 байни тимҳои мунтахаби Эрон ва Ӯзбекистон баргузор гардид. Дар ин дидор дастаи мунтахаби Эрон дар варзишгоҳи “Озоди”-и шаҳри Теҳрон тавонист ҳарифашро бо ҳисоби 2-0 шикаст дода, роҳхати аввалини Ҷоми ҷаҳон-2018-ро аз минтақаи Осиё ба даст оварад.

Аз оғози бозӣ соҳибони майдон бартариятро ба даст гирифта, якчанд маротиба ҳамлаҳои головарро анҷом доданд. Ин буд, ки дар дақиқаи 23-уми рақобат ҳамлагари эронӣ Сердар Азмун пас аз партофи хуби ҳамдастааш голи нахустини тимашро ба номаш сабт намуд. Баъдан дар қисми дуюми бозӣ довари уммонӣ Аҳмад ал-Kaҳф ба дарвозаи Ӯзбекистон зарбаи 11-метра таъин намуд. Ин имкониятро сардори дастаи соҳибони майдон Масуд Шодҷаи истифода бурда натавонист.

Дар дақиқаи 88-уми рақобат бозингари дигари мунтахаби Эрон Меҳдӣ Таремӣ голи дуюми дастаашро ба дарвозаи Александр Лобанов ворид намуда, ҳисоби бозиро 2-0 намуд.

Ёдовар мешавем, ки тими мунтахаби футболи Эрон пас аз тими Бразил, дуюмин дастаест, ки ба Ҷоми ҷаҳонӣ -2018 роҳ ёфтааст.

Шаҳбози АСОМИДДИН, “ҶТ”