Дар пайи интишори раддабандии навбатии Федератсияи футболи байналмилалӣ (ФИФА) дастаи миллии Тоҷикистон аз миёни 211 кишвар дар мавқеи 119-ум ҷой гирифт.

Раддабандии мазкур, 7 июн, дар сомонаи расмии ФИФА нашр шуда, дастаи миллии кишвар бо касби 264 хол як зина мавқеашро боло бурд.

Тими мунтахаби Олмон бо 1558 имтиёз садрнишини феҳрист шуда, бошгоҳи Бразилия дар ҷои дуюм бо 1431 хол истодааст. Инчунин дастаҳои Белгия (1298) ва Португалия (1274) ҷойҳои ифтихориро ишғол намудаанд.

Дар байни дастаҳои мунтахаби миллии Осиё, тими якачини Австралия бо 718 имтиёз дар мақоми аввал мебошад (дар умум зинаи 36-ум). Дастаи Эрон, ки то имрӯз миёни дастаҳои Осиё пешсаф буд, 10 хол кам аз Австралия дар зинаи дуюм (дар умум 37-ум) ва Кореяи Ҷанубӣ бо 544 имтиёз дар ҷои сеюм қарор гирифтанд.