Шаби чоршанбе - 7-уми феврал дар варзишгоҳи Ал-Тумамаи шаҳри Доҳа рақобати сахту сангине байни тимҳои миллии Эрону Қатар доир гардид, ки ба қавли мухлисони футбол аз финал камӣ надошт.

Ин рақабат бозии дуюми даври ниманиҳоии Ҷоми Осиё - 2023 буд, ки бо ҳисоби 3:2 ба нафъи Қатар ба поён расид.

Рақобати мазкур яке аз бозиҳои сахту ҷолиб ва серголи мусобиқа буд, ки бо суръати баланд ва ҳуҷумҳои футболбозони ҳарду даста сурат гирифт.

Ҳамлавари бомаҳорати Эрон Сардор Озмун дар ибтидои нимаи аввали дидор, дар дақиқаи 4-ум, ҳисобро кушод. Ӯ тӯбро бо зарбаи пуштнокӣ вориди дарвоза кард, ки ин голро метавон зеботарин голи Ҷоми Осиё - 2023 номид.

Голи тезкори эрониҳо натавонист руҳияи қатариҳоро ба ҳам занад. Чун пас аз 13 дақиқа Ҷассим Габер аз дохили ҷаримагоҳ зарба зада, ҳисобро баробар намуд. Голи дуюми қатариҳоро ҳамлагар Акрам Афиф, дар охири нимаи аввали дидор, дар дақиқаи 43-юм, ба самар расонд. Ин бозигари моҳир, ки дар ҷаримагоҳ дар иҳотаи чаҳор футболбози мунтахаби Эрон қарор дошт, бо зарбаи сахт тӯбро ба кунҷи дарвоза ворид кард.

Дарвоқеъ, ин голи панҷуми Афиф ба шумор меравад. Ҳоло ӯ дар рӯйхати нишонзанҳои беҳтарини Ҷоми Осиё - 2023 баъди Айман Ҳусейн аз дастаи мутахаби Ироқ, ки 6 гол задааст, дар ҷойи дуюм мебошад.

Дастаҳо бо ҳисоби 2:1 ба нафъи мизбонон ба танаффус баромаданд. Дар оғози нимаи дуюми бозӣ баъди зарбаи бозигари Эрон тӯб дар ҷаримагоҳ ба дасти футболбози қатариҳо расид.
Сардовари бозӣ Аҳмад Ал-Алӣ аз Кувайт пеналтӣ ё ҷаримаи 11-метрӣ таъйин кард. Тӯбро Алиризо Ҷаҳонбахш ба нишон расонд ва ҳисоб баробар шуд - 2:2.

Голи сеюм ва ҳалкунандаи бозиро Алмоез Алӣ, ҳамлагари қатариҳо, дар дақиқаи 82-юм зад. Ӯ тӯбро аз дохили ҷаримагоҳ ба дарвозаи эрониҳо ворид кард.

13 дақиқаи иловакардаи сардовар ба замони асосии нимаи дуюми бозӣ ҳам пуршиддат гузашт, лаҳзаҳои голзанӣ барои ҳарду даста хеле зиёд буд, аммо ҳисоб тағйир наёфт.

Бояд гуфт, ки дар дақиқаи 90+3 бозигари тими миллии Эрон Шуҷоъ Халилзода барои бозии хатарнок муқобили рақибаш аз майдон хориҷ шуд ва эрониҳо дар майдон як нафар кам буданд.

Ҳамин тариқ, бозии дуюми ниманиҳоӣ бо пирӯзии мунтахаби Қатар бо ҳисоби 3:2 ба поён расид ва мизбонон ба финали Ҷоми Осиё - 2023 роҳ ёфтанд.

Дастаи мунтахаби Қатар дар бозии ниҳоӣ, ки рӯзи шанбеи 10-уми феврал дар варзишгоҳи миллии шаҳри Лусаили Қатар соати 18:00 бо вақти маҳаллӣ (20:00 бо вақти Душанбе) шуруъ мешавад, бо тими миллии Урдун рақобат мекунад, ки мухлисон шоҳиди як финали ҷолиби арабӣ хоҳанд шуд.

Яҳё МАҲМАДНАБИЕВ, “ҶТ”