Ду ҷудокори меҳан, Рошид Неъматов ва Бобоҷон Шаропов ба финали вазни -73кг Қаҳрамонии ҷудои наврасони Осиё, ки дар шаҳри Ҷакартаи Индонезия ҷараён дорад, роҳ ёфтанд.

Рошид Неъматов дар вазни то 73 кг даври аввалро озод паси сар карда, дар даври ҳаштякниҳоӣ Кадек Дви Виная аз Индонезия, дар даври чаҳорякниҳоӣ Субҳон Ҳакимӣ аз Эрон ва дар даври нимниҳоӣ Игор Криволапов аз Қирғизистонро шикаст дода, бо сари баланд ба финал баромад.

Бобоҷон Шаропов дар вазни то 73 кг даври аввалро озод паси сар намуда, дар даври ҳаштякниҳоӣ Тсу Яо аз Тайбеи Чин, дар даври чаҳорякниҳоӣ Даулеткерей Казсейфил аз Қазоқистон ва дар даври нимниҳоӣ Минсунг Ҷеон аз Кореяи Ҷанубиро мағлуб карда, ба финал баромад.

Ҳамакнун, дар финали вазни то 73 кг паҳлавонҳои тоҷик Рошид ва Бобоҷон бо ҳам баҳри дарёфти медали тилло талош мекунанд. Яъне дар ин вазн медалҳои тилло ва нуқра моли Тоҷикистон шуданд.

Ҳамчунин намояндаи дигари Тоҷикистон Абубакр Абдуҷалилзода низ дар ин вазн барои медали биринҷӣ рақобат мекунад.
Бояд гуфт, ки дар рӯзи якуми Чемпионат Мадина Қурбонзода дар вазни то 52 кг ба гирифтани медали тилло шарафёб гардид.
Мадина Қурбонзода бо ин медали тилло исмашро дар таърихи ҷудои тоҷик сабт намуд ва аввалин ҷудокорбонуи тоҷик гардид, ки дар Чемпионати Осиё миёни наврасон соҳиби медали тилло шуд.

Яҳё МАҲМАДНАБИЕВ, “ҶТ”