Тими футболи Донишгоҳи миллии Тоҷикистон нақша дорад дар ояндаи наздик ҳам дар самти футболи хурд (футзал) ва ҳам дар самти футболи бузург дар лигаҳои кишвар бозӣ намояд. Дар ин бора имрӯз, 29-уми январ дар нишасти матбуотии ДМТ хабар дода шуд.

Дар нишаст иттилоъ дода шуд, ки соли равон дастаи футболи хурди донишгоҳ аллакай фаъолияти хешро оғоз кард, аммо бо иллати навтаъсис будану камтаҷрибагии бозингарон даста дар марҳилаи муқаддамотӣ шикаст хӯрда, аз идомаи рақобатҳои имсола байни футзалҳои кишвар бенасиб гардид. Инчунин, қайд гардид, ки футболи калони донишгоҳ, низ аз ҳисоби устодону донишҷӯёни бомаҳорати футболдӯст таркиб ёфта, нақша доранд дар ояндаи наздик дар лигаҳои кишвар бозӣ намуда, то ба сатҳи баромад дар лигаи олии кишвар бирасанд.

Бояд гуфт, ки омодагиҳои футболбозони ДМТ дар маҷмааи варзишии “Шаҳраки донишҷӯён” сипарӣ мегарданд. Маҷмааи мазкур низ дастоварди шаш моҳи охири донишгоҳ мебошад, ки 31-уми августи соли 2023 дар масоҳати 17 405 метри мураббаъ сохта, ба истифода дода шуд.