Ҳайати бозингарони дастаи мунтахаби ҷавонони Тоҷикистон (U-20) оид ба футбол ҳамроҳи сармураббии даста дар доираи омодагӣ ба қисми ниҳоии Ҷоми Осиё-2023 барои анҷоми ҷамъомади таълимиву тамринӣ ба Туркия сафар карданд.

Тибқи иттилои Федератсияи футболи Тоҷикистон дар ин ҷамъомади таълимиву тамринӣ Олег Кубарев, сармураббии дастаи ҷавонони Тоҷикистон 26 бозигар – 3 дарвозабон, 9 ҳимоятгар, 9 нимҳимоятгар ва 5 ҳамлагарро ҷалб сохтааст. Нимҳимоятгари дастаи “Атирау”-и Қазоқистон Хусрав Тоиров ва бозигари дастаи “Краснодар-2” Алиҷони Айнӣ дар ҳайати бошгоҳҳои худ дар Анталия қарор доранд ва дар бозиҳои санҷишии дастаи мунтахаби ҷавонони Тоҷикистон (U-20) ширкат мекунанд. Дар Анталия дастаи мо ҳафт вохӯрии санҷишӣ мегузаронад.

Бояд гуфт, ки қисми ниҳоии Ҷоми Осиё-2023 миёни дастаҳои ҷавонони то 20-сола аз 1 то 18 март дар Ӯзбекистон баргузор мешавад. Дар мусобиқоти қаҳрамонии Осиё тими ҷавонони Тоҷикистон дар гурӯҳи “С” бо дастаҳои Урдун (2 март), Уммон (5 март) ва Кореяи Ҷанубӣ (8 март) бозӣ мекунад.

Пас аз ҷамъбасти Ҷоми Осиё-2023 миёни ҷавонон дар Ӯзбекистон чаҳор дастаи беҳтарин соҳиби роҳхат ба Ҷоми ҷаҳон-2023 дар Индонезия мегардад.

Ҳайати мунтахаби ҷавонони Тоҷикистон аз ин нафарон иборат аст:

Дарвозабонҳо: Суҳробхӯҷа Юсупов, Сафармад Ғаффоров, Шаҳобиддин Маҳмудзода.

Ҳимоятгарон: Фахриддин Аҳтамов, Рӯзимуҳаммад Абдураҳмонов, Раҳматшо Раҳматзода, Меҳрубони Абдурауф, Содиқҷон Қурбонов, Шаҳриёри Иноятулло, Диёрбек Марауфов, Асадбек Зиёзода, Меҳрубон Каримов.

Нимҳимоятгарон: Амадонӣ Камолов, Кабир Салимшоев, Салоҳиддин Иргашев, Азизбек Ҳаитов, Фатҳулло Олимзода, Бежан Нишонбойзода, Абдулло Шарипов, Ҳамзаҷон Аҳтамов, Салам Ашурмамадов.
Ҳамлагарон: Далер Шарифов, Муҳаммадалӣ Азизбоев, Фаридун Давлатов, Сунатулло Азизов, Абдулфаттоҳ Худойдодзода.

Сармураббӣ: Олег Кубарев.