Дар даври 14-уми Чемпионати Тоҷикистон оид ба футбол ду дастаи вилояти Хатлон аз рақибонашон шикаст хурда, имтиёз аз даст доданд.

Рӯзи 7-уми август дастаи “Хатлон” дар варзишгоҳи “Политехникум”-и шаҳри Душанбе бо тими КМВА рақобат намуд. Ҳисоби бозиро дар дақиқаи 5-уми рақобат соҳибони майдон кушоданд. Баъди гузашти 3 дақиқа ҳамлагари “Хатлон” Жан Гатен ҷавоб гардонд. Ҳамин тавр қисми аввали дидор бо ҳисоби 1:1 анҷомид.

Дар дақиқаи 85-ум нисбати ҳамлагари “Хатлон” Жан Гатен қоидаи бозӣ вайрон карда шуд ва довари дидор ҳимоятгари КМВА, Алиҷони Кароматуллозодаро бо корти сурх ҷазо дод. Вале бо гузашти чанд лаҳзаи дигар пай дар пай нисбат ба 2 ҳамлагари “Хатлон” Жан Гатен ва Нуриддин Ҳамроқулов довари майдон корти сурх нишон дод. Мизбонон аз фурсат истифода карда, дар дақиқаи иловагӣ бартариро соҳиб шуданд.

Тими “Файзканд”-и ноҳияи Восеъ бошад, 8 август бо тими “Истиқлол”-и шаҳри Душанбе дар варзишгоҳи марказии пойтахт андари майдон шуда, ба ҳисоби 0-4 мағлуб шуд.

Дар даври навбатии Чемпионати Тоҷикистон оид ба футбол 14 август дастаи “Хатлон” дар хонаи худ бо тими “Истиқлол” андари рақобат мешавад.