Дастаи яккачини ҷавонони кишвар оид ба футбол рақобати дуюми худро дар доираи мусобиқаи байналмилалӣ бо ҳамсолонашон тими миллии Чин доир намуда, мусовӣ бо ҳисоби 1:1 анҷом дод.

Бозии мазкур 6-уми сентябр дар шаҳри Тсюйтсзини Чин ҷараён гирифт. Дар ин дидор аввалин шуда шогирдони Мубин Эргашев сармураббии тими мунтахаби 21-солаи кишвар ҳисобро дар дақиқаи 42-юм боз намуданд. Муаллифи гол Муҳаммадҷон Раҳимов дониста шуд. Дар дақиқаи 69-уми қисми дуюми бозӣ соҳибони майдон ҳисобро баробар карданд.

Аз сабаби боришоти зиёд майдон пуроб гардида, рақобат барои футболбозон имконнопазир шуд ва сардовар Хуанг Ечжун бозиро дар дақиқаи 77-ум қатъ намуд. Бо қарори ташкилкунандагони мусобиқа натиҷаи бозӣ бо ҳамин ҳисоб - 1:1 хотима ёфт.

Дар дидори дигар тими мунтахаби ҷавонони Ӯзбекистон (U-21) дастаи миллии Мянмарро (U-21) бо ҳисоби 2:0 шикаст дода, бо касби 6 имтиёз садрнишини мусобиқа гардид.

Тими мунтахаби Чин бо 4 хол дар зинаи дуюм меистад. Тими миллии Тоҷикистон, ки дар дидори якум аз тими ҷавонони Ӯзбекистон бо ҳисоби 1-0 шикаст хӯрда буданд, бо касби 1 имтиёз дар мақоми сеюм қарор дорад. Яккачини Мянмар бидуни имтиёз дар зинаи охирин мебошад.

Мунтахаби ҷавонони Тоҷикистон (U-21) дар мусобиқаи байналмилалӣ, ки аз 6 то 8 сентябр дар Чин баргузор мегардад, бозии охиринашро бо тими мунтахаби Мянмар анҷом хоҳад дод.