ВАРЗИШ
Чоршанбе 12 Август 2020 05:54
7169
Тавре маълум аст, пандемияи коронавирус ба ҳамаи соҳаҳо зарари манфии худро расонид. Таъсири он ба соҳаи варзиш, махсусан футбол низ эҳсос мешавад. Мусобиқаҳои футбол, ки бештар дар сафарҳо баргузор мешуданд, бо баста шудани сарҳадҳо ба муҳлати дигар ва баъзеаш ба муҳлати номуайян гузошта шуданд. Имрӯз бештари мусобиқаҳои футболи дастаҳо бе ҳузури тамошобин мегузарад ва аз ин ҳам сармоягузорон ва ҳам ташкилкунадагони мусобиқаҳо зарари молиявӣ мебинанд. Футболи тоҷик низ бо хурӯҷи коронавирус ба мушкилӣ рӯ ба рӯ гардидааст. Оид ба зарари пандемия ба футболи тоҷик ва вазъи имрӯзи он бо котиби матбуотии Федератсияи футболи Тоҷикистон (ФФТ), Фаридун Солиев ҳамсуҳбат шудем, ки фишурдаи онро манзури хонандагон мегардонем.

- Вазъи имрӯзаи футболи тоҷикро чӣ гуна арзёбӣ мекунед?

- Пандемияи коронавирус ба футболи тоҷик низ таъсири манфии худро расонид. Аз моҳи апрели соли чорӣ тимҳои миллии Тоҷикистон ба хотири баста будани марзҳо ба хориҷи кишвар барои баргузории тамрин ва бозиҳои дӯстонаи байналмилалӣ сафар карда наметавонанд. Бозиҳои тими миллии Тоҷикистон дар мусобиқаҳои интихобии Ҷоми ҷаҳон-2022 ба моҳҳои октябр ва ноябр ба таъхир гузошта шуд. Чемпионати Осиё миёни наврасон дар Баҳрайн, ки дар он дастаи Тоҷикистон низ ширкат меварзад, ба моҳҳои ноябр-декабр ба таъхир гузошта шуд.

Вале умедворем, ки вазъи эпидемиологӣ хуб хоҳад шуд ва бо кушода шудани сарҳадҳо тимҳои миллии мо метавонанд дар мусобиқаҳои банақшагирифтаи байналмилалӣ ширкат кунанд.

- Мегуфтед, ки бе тамошобин ва мухлис гузаронидани мусобиқаи футбол то куҷо ба буҷаи ФФТ ва бошгоҳ (клуб)-ҳо зарари молиявӣ меорад?

- Аз бетамошобин гузаштани бозиҳои футбол на Федератсияи футболи Тоҷикистон, балки бошгоҳ (клуб)-ҳои олии Тоҷикистон зарар диданд. Барои мисол, бозиҳои хонагиии бошгоҳи “Истаравшан” соли 2019 ба ҳисоби миёна 7-8 ҳазор мухлисро ҷалб карда буд. Вуруд ба варзишгоҳ аз 5 то 10 сомонӣ нарх дошт. Ба ҳисоби миёна дар ҳар бозӣ клуби “Истаравшан” аз фурӯши чиптаҳо 15-20 ҳазор сомонӣ фоида ба даст меовард. Тавре директори клуби “Истаравшан” Асрор Шораҷабов хабар дод, дар бозӣ бо дастаи “Хуҷанд” клуб ба маблағи 30 ҳазор сомонӣ чипта фурӯхтааст. Ба гуфтаи ӯ, дар соли гузашта “Истаравшан” обунаи мавсимии худро ба даст оварда буд. Агар дар назар бигирем, ки имсол мусобиқа бо иштироки 10 даста мегузарад, пас “Истаравшан” дар майдони худ бояд 9 бозӣ гузаронад. Аз ин рӯ, аз сабаби он ки бозиҳо бе тамошобин мегузаранд, буҷаи клуби “Истаравшан” тахминан 200 ҳазор сомонӣ ба даст намеорад. Соли гузашта, клуби “Истаравшан” аз фурӯши чиптаҳои мавсимӣ 350 ҳазор сомонӣ ба даст оварда буд.

Айнан ҳамин мушкилиро дастаи “Куктош” дорад. Бозиҳои хонагии ин даста бо иштироки 4-5 ҳазор тамошобин мегузарад ва аз фурӯши онҳо дастаи “Куктош” аз 5 то 10 ҳазор сомонӣ фоида ба даст меоварад.

Инчунин, клуби “Истиқлол” низ зарар дид. Бозии хонагии Ҷоми АФК “Истиқлол” бар муқобили “Хуҷанд”, ки моҳи март бе тамошобин гузашт, метавонист ба сандуқи клуб бо иштироки тамошобинон тақрибан 100 ҳазор сомонӣ ворид намояд. Мутаассифона, вазъият имкон надод, ки чунин шавад.

Дар мавриди худи Федератсияи футболи Тоҷикистон ҳаминро мегӯям, ки танҳо дар бозиҳои тимҳои миллӣ чиптаҳоро ба фурӯш мегузорем. Тими миллии Тоҷикистон имсол ягон бозӣ нагузаронидааст. Вале соли гузашта дар ду бозии хонагӣ - дар бозии интихобии Ҷоми ҷаҳон-2022 бар муқобили тимҳои миллии Қирғизистон ва Ҷопон, Федератсияи футболи Тоҷикистон аз ҳисоби фурӯши чиптаҳо тақрибан 300 ҳазор сомонӣ фоида ба даст овард. Дар баробари ин дар ташкили бозиҳо ФФТ низ хароҷоти калон ба дӯш дошт. Ҷобаҷокунии тими миллии Қирғизистон дар Душанбе, инчунин, ҳайати доварон ва комиссарҳо дар меҳмонхонаҳо маблағи калонро талаб мекунад. Ҷобаҷокунии тими миллии Тоҷикистон дар меҳмонхонаҳои “Серена” ва “Атлас” ҳангоми мусобиқа низ хароҷоти зиёд аст.

- Дар бозиҳои футбол ва умуман ҳамаи мусобиқаҳо бештари вақт сармоягузорон барои тарғиби маркаи худ, бозиҳоро сармоягузорӣ мекунанд. Ҳангоме бозӣ бе тамошобин баргузор мегардад, ширкатҳои сармоягузорӣ чӣ гуна онҳоро дастгирӣ мекунанд?

- Дар чемпионатҳои Тоҷикистон клубҳое ширкат мекунанд, ки аз тарафи давлат маблағгузорӣ мешаванд. (“Хуҷанд”, “Хатлон”, “Истаравшан”, “ССКА”). Мутаассифона, аз таъсири пандемияи коронавирус имрӯз якчанд клубҳои кишвар ба мушкилии ҷиддии молиявӣ дучор шудаанд.

- Ба наздикӣ ФФТ аз Федератсияи байналмиллалии футбол (ФИФА) як миллион доллар грант барои бартараф намудани оқибатҳои пандемия дар соҳаи футбол ба даст меорад. Мегуфтед, ки ин ин миқдор маблағ барои муътадил кардани ҳолати баамаломада кофӣ аст?

- Федератсияи байналмилалии футбол (ФИФА) барои кумак ба федератсияҳои миллии кишварҳои олам дар мубориза ба пандемияи коронавирус 1,5 миллиард доллар маблағ ҷудо кардааст. Мувофиқи ин барнома кӯмак ба ҳамаи ассотсиатсияҳои аъзои ФИФА, аз ҷумла, Тоҷикистон низ расонида мешавад. 211 ассотсиатсияи узви ФИФА як миллион долларӣ грант ва гранти иловагӣ дар ҳаҷми 500 ҳазор доллар барои рушди футболи занона кӯмакпулӣ хоҳанд гирифт. Ин грантҳо аз ҷониби ассотсиатсияҳои аъзо ба ҷомеаи васеи футбол дар қаламравҳои марбутаи худ, аз ҷумла клубҳо, лигаҳо ва ё дигар ҷонибҳои зарардида равона карда мешаванд.

Бояд гуфт, ки аз ҷониби Федератсияи байналмилалии футбол тартиби хароҷоти ин маблағҳо пешбинӣ шудааст. Ҳар як федератсияи миллӣ вазифадор аст, ки оид ба харҷи маблағҳои ҷудошуда ба ФИФА ҳисобот диҳад. Вале то ҳол ин маблағҳо ба Федератсияи футболи Тоҷикистон ворид нагаштаанд.

Бояд қайд намуд, ки бо вуҷуди таъсири пандемия ФФТ ба лига ва клубҳое, ки дар давраи пандемия зарари ҷиддӣ дидаанд, кӯмаки ҳамаҷониба мерасонад.

Мусоҳиб,
Садбарг СУЯРОВА, “ҶТ”

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
27 28 29 30 31 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6

Август 2020 c.