30-юми январ Ҷамъияти дорои масъулияти маҳдуди “Газпромнефти Тоҷикистон – Равғанҳои молиданӣ” бо ба имзо расонидани як қарордоди расмӣ барои як сол сарпарастии Федератсияи футболи Тоҷикистонро дар самти баргузории бозиҳои футбол миёни футболбозони навраси Тоҷикистон ба дӯш гирифт.

Дилшод Ҷӯразода, ноиби Президенти ФФТ зимни бастани қарордод бо Азиз Авғонов, ҷонишини директори генералии ширкати маблағгузор гуфт, ки ин аввалин бор аст, ки ширкати “Газпромнефти Тоҷикистон – Равғанҳои молиданӣ” бо федератсия дар самти дастгирии футбол миёни наврасону кӯдакон қарордод мебандад.

- Мо умедворем, ки бастани ин қарордод ва оғози ҳамкориҳо бо ширкати “Газпромнефти Тоҷикистон – Равғанҳои молиданӣ” ба рушди бесобиқаи футболи миллӣ, махсусан ба футбол миёни наврасону кӯдакон такони мусбати ҷиддие хоҳад дод. Қаблан низ федератсия бо ҷалби маблағгузориҳои хориҷиву дохилӣ фаъолияти худро баҳри рушди бештар додани футболи Тоҷикистон ба роҳ монда буд. Акнун бо оғози ҳамкориҳои дуҷонибаи ФФТ ва ширкати сармоягузор “Газпромнефти Тоҷикистон – Равғанҳои молиданӣ” мо метавонем имкониятҳои бештару беҳтари рушду нумуи футболи ватаниро дошта бошем,-  афзуд Ҷӯразода.

Азиз Авғонов, ҷонишини директори генералии ҶДММ “Газпромнефти Тоҷикистон – Равғанҳои молиданӣ” бастани ин қарордод ва дастгирии ширкаташонро “мухлисии футболи ватанӣ ва саҳм гузоштан дар рушди варзиши миллӣ” унвон кард. Ӯ гуфт, ки “ҳоло мо бо раҳбарияти ФФТ барои як сол қарордод бастем. Агар бинем, ки натиҷаҳои хуб ба даст оянд, боз дар мавриди тамдид намудани қарордоди ҳамкорӣ тасмим хоҳем гирифт”.

- Барои ширкати мо албатта ин як навъи таблиғ мешавад. Аммо шахсан, барои худи ман ҳамчун як тоҷик, аз ҳама аввалу асосӣ хизмат ба миллату ватан ва барои рушди як соҳаи кишварамон каме ҳам бошад, саҳми худро гузоштан аст. Имрӯз, ки бо дар сатҳи раёсати як ширкати бонуфуз кор кардан имконияти кӯмак карданро дорам, вазифаи худам медонам, ки кореро анҷом диҳам,-гуфт Азиз Авғонов.

Мавриди зикр аст, ки баъд аз як қатор корнамоиҳо ва ғолибиятҳои пайдарпайи дастаи футболбозони навраси Тоҷикистон дар сатҳи байналмилалӣ ва ҷаҳонӣ таваҷҷуҳи ширкату ташкилот барои кӯмак ва сармоягузорӣ дар самти рушди футбол бештар шуда истодааст.