ВАРЗИШ
Якшанбе 18 Август 2019 10:40
6351
Онҳое, ки ҷасурии бонуи тоҷикро ба ҷаҳониён муаррифӣ карданд

Соҳае, ки дар баробари дигар соҳаҳо кишварро дар арсаи ҷаҳонӣ муаррифӣ месозаду тавассуташ Парчами кишвар парафшон мегардад. Соҳае, ки ба дигарон шодиву нишот мебахшад. Соҳае, ки фатҳаш боиси хушбахтии на танҳо худи оне, ки дар он равонааст мегардад, балки омили хушрӯзии дигарон низ мешавад. Соҳае, ки шахсро неруманд месозад ва барои муаррифӣ сохтани Ватан дар арсаи ҷаҳонӣ таҳрик медиҳад. Соҳае, ки қосиди сулҳу дӯстӣ дар ҷаҳон эътироф гардидааст. Соҳае, ки ин ҳама хусусиятҳоро доросту имрӯз дӯстдорони зиёди худро дорад, варзиш мебошад. 

Варзиш дар ҷаҳони муосир аз маъмултарин соҳаҳое дониста мешавад, ки ҳар нафари равонаи он ҳамеша тандуруст, неруманд, чусту чолок ва рӯҳану ҷисман солим буда, он боиси дурӣ ҷустан аз омилҳои номатлуб мегардад.

Хушбахтона, бо дарки гуфтаҳои боло имрӯз наврасону ҷавонон ва ҷавондухтарон дар риштаҳои гуногуни варзиш ба машқу тамрин машғул буда, вақти қимати хешро самаранок истифода мебаранд ва дар баробари ин бо истифода аз малакаву истеъдоди хеш дар чорабиниҳои гуногуни варзишӣ иштирок ва бо ишғол намудани мақомҳои ифтихорӣ обрӯи кишвари хешро дар сатҳи байналмилалӣ баланд мебардоранд. 

Дар Ҷумҳурии Тоҷикистон аз ибтидои соҳибистиқлолӣ ба соҳаи варзиш таваҷҷуҳи махсус равона гардида, барои хубтару беҳтар машғул гардидан ба варзиш тамоми имкониятҳои зарурӣ ва шароити мусоиди машқу тамрин фароҳам оварда шуда, имрӯз дар дурдасттарин шаҳру ноҳияҳои кишвар мактабу толорҳои варзишӣ баҳри дӯстдорони ин ришта мавҷуд мебошад.

Боиси ифтихор аст, ки бо истифода аз ин имкониятҳо баробари ҷавонон, ҷавондухтарону бонувон низ ба варзиш андармон гардида, то имрӯз дар ин ҷода аз худ дарак додаву тавассути истеъдоди варзишии хеш Тоҷикистонро миёни дигар кишварҳо муаррифӣ сохтаанд.
Ба варзиш машғул гардидани бонувони тоҷик чун анъана буда, дар гузашта низ бонувон бо азму иродаи қавӣ ба ин ҷодда қадам мениҳоданду чун аҷдодони хеш саҳми хешро дар рушди ин соҳа мегузоштанд. Имрӯз низ ин анъана идома ёфта, дар соҳаи варзиш садҳо нафар гурдофаридон равонанд.

Дастгирӣ, ғамхорӣ ва фароҳам овардани шароити муосир дар риштаи варзиш солҳои охир боиси рӯ ба зиёдшавӣ овардан шумораи бонувони варзишгар гардида, имрӯз дар тамоми мактабҳои варзишӣ ва дар дилхоҳ риштаи варзиш бонувон низ пайи тамрин ва машқварзиянд. Далели ин гуфтаҳо он аст, ки айни ҳол дар мактабҳои варзишӣ то нимсолаи аввали соли 2019 дар 3989 гурӯҳ 5958 нафар бону (466 бону нисбат ба ҳамин давраи соли 2018 зиёд) ба машқу тамрин фаро гирифта шудаанд.

Имрӯз миёни бонувони варзишгар нафароне ҷой доранд, ки номи кишварро на танҳо дар дохил, балки дар хориҷ низ баланд бардоштаву боиси муаррифӣ гардидани кишвар дар сатҳи ҷаҳонӣ шудаанд. Яке аз чунин бонувони варзишгар, ки ҳамеша бо ба забон овардани исмаш эҳсоси ифтихору сарфарозӣ моро фарогир мешавад, Зебунисо Рустамова, барандаи медали биринҷии Бозиҳои тобистонаи олимпии Монтреали Канада дар соли 1976 оид ба камонварӣ мебошад. Воқеан, Зебунисо Рустамова дар асри гузашта, бори дигар ба ҷаҳониён собит сохт, ки бонуи тоҷик бонуи тавоно, ҷасур ва дорои иродаи қавист. Зеро ҳамин гуна хусусиятҳои ин варзишгарбонуи тоҷик буд, ки дар бузургтарин чорабинии варзишӣ – Бозиҳои олимпӣ, ки он қуллаи баландтарин дар риштаи варзиш дониста мешавад, соҳиби мақоми ифтихорӣ гардиду номи бонуи тоҷикро ба ҷаҳониён муаррифӣ сохт.

Замони соҳибистиқлолӣ низ бо дастгирӣ ва ғамхории Ҳукумати кишвар, махсусан Президенти мамлакат муҳтарам Эмомалӣ Раҳмон бонувон дар ҷодаи варзиш ба дастовардҳои зиёди варзишӣ ноил гардидаанд. Яке аз варзишгарбонуе, ки бо истифода аз имкониятҳои фароҳамгардида, дар даврони соҳибистиқлолӣ малакаи варзишии бонуи тоҷикро ба ҷаҳониён ошно сохту дар баробари ин Парчами Тоҷикистонро миёни дигар давлатҳо баланд бардошт, Мавзуна Чориева – барандаи медали биринҷии Бозиҳои тобистонаи олимпии Лондон-2012 оид ба бокс мебошад.

Имрӯзҳо ҷавондухтарон ба маҳорату малака ва дастовардҳои ин ду бонуи варзишгар, ки дорандаи мақомҳои ифтихорӣ дар арсаи ҷаҳонианд, менигаранду бо дасту дили гарм ба варзиш машғуланд, то онҳо низ тавонанд, тавассути маҳорати варзишии хеш кишвари худро дар мусобиқаҳои байналмилалӣ муаррифӣ созанд.

Дар мусобиқаҳои варзишии дохилӣ варзишгарбонувон фаъолона иштирок намуда, ба гуфти масъулини соҳа дар нимсолаи аввали соли ҷорӣ дар доираи баргузории марҳилаҳои интихобӣ дар қаламрави кишвар 2660 мусобиқаҳои интихобии марҳилаи якум ва дуюм дар сатҳи дохили мактабӣ, ноҳиявӣ, шаҳрӣ, вилоятӣ ва минтақавӣ доир гардиданд, ки дар онҳо 281351 нафар, аз ҷумла 73555 бонувон иштирок намудаанд. 

Бино ба иттилои Кумитаи кор бо ҷавонон ва варзиш дар мусобиқаҳои варзишии касбӣ, ки дар сатҳи ҷумҳуриявӣ доир гардиданд, дар 18 чемпионати Ҷумҳурии Тоҷикистон, 71 мусобиқаҳои ҷумҳуриявӣ аз намудҳои футбол, волейбол, тӯби дастӣ, чавгонбозӣ, лижаронии куҳӣ, варзиши сабук, шоҳмот, вазнабардорӣ ва дзюдо байни маъюбон, шоҳмот, гўштини миллӣ ва теннис 1409 варзишгарбону иштирок кардаанд.

Солҳои охир дастоварди бонувони варзишгар дар мусобиқаҳои хориҷӣ хуб гардида, аз ҳар чорабинии варзишӣ онҳо бо медал ба Ватан бармегарданд, ки боиси таҳсин аст. Варзишгарбонувоне, ки то ин дам дар мусобиқаҳои байналмилалӣ аз риштаҳои гуногуни варзиш дорои медал ва ҷойҳои ифтихорӣ гардидаанд, инҳо Зулқайнарова Шоира медали нуқра, Холова Идимоҳ медали биринҷӣ ва Ойматова Муниса медали нуқра аз намуди бокс, Бегмуродова Фотима, медали тилло аз намуди кудова к-1, Маҳмадова Насибахон медали нуқра аз варзиши сабук, Сабрина Абророва медали нуқра ва Саидова Рухшона медали биринҷӣ аз намуди шоҳмот, Кристина Пронженко медали тилло, Шарифова Гулсумбӣ медали тилло, Маҳбуба Тоштемирова медали нуқра ва Ҷумаева Лолахон, медали нуқра аз намуди варзиши сабук, Гадоева Фотимахон, медали тилло аз намуди варзиши ҷиу-ҷитсу, Исматова Муниса, медали нуқра, Мадинаи Маҳмудшоҳ, медали нуқра, Сафарова Хосият, медали нуқра, Сафарова Меҳрубон, медали нуқра, Сафарова Маҳина медали нуқра, Ҳалимова Муфара, медали тилло ва Миршакарзода Ширинмоҳ, медали нуқра аз варзиши таеквондо ВТФ, Лутфинисо Ҷурабоева медали тилло аз карате-до, Моҳру Ҳалимова, медали нуқра соли 2016 ва медали биринҷӣ соли 2018 дар Чемпионати Осиё аз риштаи таеквондо, Даря Галчанская медали нуқра, Мухакова Баҳор медали нуқра ва Жасмина Нурматова медали биринҷӣ аз варзиши гимнастикаи бадеӣ мебошанд.

Ба чунин дастовардҳо ноил гардидани варзишгарбонуҳои кишвар натиҷаи дастгирӣ ва муҳайё будани шароитҳои замонавии варзишӣ дониста мешавад. Амир Иброҳимзода, мудири Бахши кор бо ҷавонон ва варзиши ноҳияи И.Сомонӣ ба ин назар аст, ки баъди ба даст овардани Истиқлолияти давлатӣ мақом ва манзалати занону бонувон дар ҷомеа баланд бардошта шуд, ки ин аз таваҷҷуҳ ва дастгириҳои роҳбарияти олии кишвар, Пешвои муаззами миллат муҳтарам Эмомалӣ Раҳмон дарак медиҳад. 

“Имрӯз агар иддае аз занону бонувони сарбаланди тоҷик дар соҳаҳои маорифу тандурустӣ ва саноат кору фаъолият намоянд, хушбахтона иддае аз дигари онҳо дар самти татбиқи ҳадафмандонаи сиёсати давлатии ҷавонон ва варзиш заҳмату талош намуда, дар рушду пешрафти Тоҷикистон саҳми муносиб мегузоранд. Пушида нест, ки дар мусобиқаҳои байналмилаливу ҷумҳуриявӣ бонувони тоҷик бо эҳсоси баланди ватандӯстӣ дар байни варзишгарони машҳури давлатҳои абарқудрат қувваозмоӣ намуда, бо ишғоли ҷойҳои намоён нуфузи ин сарзаминро боз ҳам баландтар мебардоранд, ки ин иқдом ва ташаббуси наҷиби бонувони варзишгари тоҷик барои ҳар як шаҳрванди ин сарзамин шоистаи таҳсин мебошад. Бонуи тоҷик ҳар чи қадаре, ки ба варзиш зиёд ҷалб гардад, ба ҳамон андоза дар бунёди оилаи солим, тарбияи дурусти кӯдакон дар рӯҳияи меҳандӯстиву ватанпарастӣ нақши бориз мегузорад. Боварии комил дорем, ки бонувони варзишгари тоҷик оянда низ дар мусобиқаҳои дохилию хориҷӣ ҷойҳои намоёнро ишғол намуда, Парчами кишварамонро дар арсаи байналмилалӣ парафшон менамоянд”, - иброз дошт А. Иброҳимзода. 

Айни ҳол бино ба иттилои Кумитаи кор бо ҷавонон ва варзиши назди Ҳукумати Ҷумҳурии Тоҷикистон бонувоне, ки ба намудҳои олимпии варзиш ва ғайриолимпии варзиш машғуланду Ҷумҳурии Тоҷикистонро дар мусобиқаҳои сатҳи байналмилалӣ муаррифӣ менамоянд, 836 нафар мебошанд. Инчунин иштироки бонувони варзишгар дар мусобиқаҳои гуногуни ҷаҳонӣ низ хуб буда, бо мақсади муаррифии варзиши тоҷик дар арсаи байналмилалӣ варзишгарони ҳайати дастаи мунтахаби кишвар дар 6 моҳи аввали соли 2019 ба 65 мусобиқаҳои байналмилалӣ 284 нафар, аз ҷумла 24 бону сафарбар гардидаанд.

Баробари ба варзиш машғул гардидан, инчунин бонувон имрӯз дар соҳаи варзиш дар сатҳи роҳбарикунанда, аз ҷумла ба ҳайси директорони муассисаҳои тайёрии варзишӣ, муовинони директорони муассисаҳои тайёрии варзишӣ ва дастурдиҳандаҳои муассисаҳои тайёрии варзишӣ фаъолият намуда истодаанд, ки шумораи онҳо 32 нафар мебошад.

Дар маҷмуъ, имрӯз бонувон бо самимияти хос ба варзиш машғул буда, аз заҳмату талош ва кӯшишҳои пайвастаашон метавон хулоса кард, ки дар оянда низ бо маҳорату малакаи варзишии хеш варзиши тоҷикро дар арсаи ҷаҳонӣ боз ҳам бештар муаррифӣ менамоянду бо ба даст овардани мақомҳои ифтихорӣ Парчами кишварро миёни дигар давлатҳо баланд мебардоранд ва саҳми худро дар рушди варзиши меҳан мегузоранд. 


Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
29 30 31 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31 1

Август 2019 c.