Имрӯз, 10 августи соли 2017 бахшида ба Рӯзи варзишгарон ва “Соли ҷавонон” дар маҳаллаи “Садриддин Айнӣ”-и шаҳри Қӯрғонтеппа аз тарафи МИҲД-и шаҳри Қӯрғонтеппа ва соҳибкори ҷавон Маҳмадшариф Саъдуллоев ду майдончаи футболи хурд сохта ба истифода дода шуд.

Дар маросими кушодашавии майдончаҳои варзишӣ раиси вилояти Хатлон Давлатшоҳ Гулмаҳмадзода, иҷрокунандаи вазифаи раиси шаҳри Қӯрғонтеппа Исмоилзода Абдуалим, раиси федератсияи футболи вилояти Хатлон Исроил Шарипов, мудири Бахши кор бо ҷавонон ва варзизши шаҳр Исматуллозода Ҷамолиддин, сокинон ва роҳбарони маҳалла иштирок намуданд.

Исмоилзода Абдуалим ҳозиринро ба эълон гардидани "Соли ҷавонон" муборакбод намуда, гуфт, ки: “Барои тарбияи дуруст, тарғиби ҳаёти солим ба тансиҳат ба воя расондани насли имрӯза аз ҷониби Ҳукумати ҷумҳурӣ тамоми шароиту имкониятҳо фароҳам оварда шудааст”.

Сипас, Давлатшоҳ Гулмаҳмадзода ба роҳбарияти шаҳр изҳори сипос намуда, кушодашавии майдончаи варзишро ободу зебо шудани як гушаи шаҳр, номид: “Ин майдоначаҳои варзишӣ тӯҳфаест ба сокинони шаҳр, то ки онҳо ба варзиш ва фароғату истироҳат машғул шаванд”.

Майдончаҳои варзишӣ дар ҳаҷми беш аз 1 милиёну 64 ҳазор сомонӣ ташкил шуда, барои варзишгарон ва мураббиёни футбол ошхона, хуҷраи либосивазкунӣ, мағозаи варзишӣ ва чаҳор утоқи корӣ сохта шудааст.

Дар фарҷом аз тарафи раиси вилоят ба 40 нафар мураббиён ва варзишгарон сипосномаи раиси вилояти Хатлон супорида шуд.

Умед Мирзоев, “ҶТ”