Бо мақсади сазовор таҷлил намудани Рӯзи Президент ва солгарди Иҷлосияи 16-уми Шурои Олӣ дар Донишгоҳи технологии Тоҷикистон як майдончаи замонавии варзишӣ ба истифода дода шуд.

Дар ин бора аз маркази таҳлил ва иттилооти Кумитаи кор бо ҷавонон ва варзиш хабар доданд.

Тибқи иттилоъ, дар чорабинӣ муовини Раиси Маҷлиси намояндагони Маҷлиси Олии Ҷумҳурии Тоҷикистон Мавсума Муинӣ, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Гулаҳмадзода Зулфиқор Аҳмад, инчунин собиқадори ҳизбу меҳнат, вакили Иҷлосияи таърихии 16-уми Шурои Олӣ Рафиқа Мусоева, шоиру сароянда ва устоди Донишгоҳи Теҳрон доктор Муҳаммад Абдулҳусейн иштирок намуданд.

Гуфта шуд, ки ифтитоҳи ин иншооти варзишӣ гувоҳӣ аз сиёсати ҷавонпарваронаи давлат ва Ҳукумати Ҷумҳурии Тоҷикистон мебошад, ки ҳадафи асосиаш фароҳам овардани шароити мусоид барои солимгардонӣ, рушди зеҳнӣ ва тарбияи ватандӯстонаи насли наврасу ҷавон аст.

Майдончаи баистифодадодашуда барои донишҷӯёни Донишгоҳ на танҳо макони фароғату бозии солим, балки муҳити тарбияи иҷтимоӣ ва рушди истеъдодҳои нав буда, имконият фароҳам меоварад, ки ҷавонон вақти озоди худро самаранок истифода баранд. Ин иқдом бори дигар собит менамояд, ки дастгирии ҷавонон ва рушди инфрасохтори варзишӣ яке аз самтҳои афзалиятноки сиёсати Пешвои миллат ба шумор меравад.

“ҶТ”