Ба муносибати 30-солагии Истиқлолияти давлатии Ҷумҳурии Тоҷикистон дар маҳаллаи Тиллокони шаҳри Хуҷанд Маҷмааи варзишии “Тир” ба истифода дода шуд.

Дар маросими ифтитоҳии иншооти мазкур Президенти Федератсияи тирпарронии Ҷумҳурии Тоҷикистон Беҳзод Файзуллоев, муовини раиси шаҳри Хуҷанд Фирӯза Нуруллозода, сардори Раёсати кор бо ҷавонон ва варзиши вилояти Суғд Мирзоқосим Каримзода, сокинони маҳалла ва варзишгарон ширкат варзиданд.

Иттилоъ дода шуд, ки иншооти мазкур аз ҷониби мураббӣ оид ба намуди тирпарронӣ Марат Абдукаримов ба маблағи 1 миллион сомонӣ сохта шуда, дар ин маҷмаа барои дӯстдорони намудҳои гуногуни варзиши тирпарронӣ шароит муҳайё гардидааст.

Шаҳрвандон дар ин макон метавонанд маҳорати тирпаррониро омӯзанд ва онро такмил диҳанд. Бинои мазкур аз 3 ошёна иборат буда, бо технологияи навтарин муҷаҳҳаз мебошад.