Имрӯз бо иштироки муовини аввали раиси Кумитаи кор бо ҷавонон ва варзиши кишвар Назарзода Ризо Шодӣ, муассисаи давлатии таҳсилоти “Мактаб-интернати тамоюли варзишии ба номи Иброҳим Ҳасанов” дар ноҳияи Синои шаҳри Душанбе, ки нав аз таъмир баромадааст, ба истифода дода шуд.

Дар ифтитоҳи бинои тозатаъмири мактаб-интернати мазкур намояндагони ВАО-и кишвар, варзишгарзани тоҷик Мавзуна Чорива, котиби генералии Кумитаи миллии олимпӣ ва дигарон иштирок намуданд.

Дар ҷараёни ифтитоҳи бинои таъмиргардидаи муассиаи таълимии мазкур гуфта шуд, ки таъмири ин бино бо дастуру супоришҳои Президенти Кумитаи миллии олимпӣ, Пешвои миллат, муҳтарам Эмомалӣ Раҳмон таъмир гардидааст.

Дар доираи таъмири бинои зикргардида толорҳои варзишӣ барои намудҳои гӯштини миллӣ, гӯштини юнонӣ-римӣ, ҷудо, бокс, самбо, ҳаммом, утоқҳои кории мураббиён, ошхона, боми бино ва намои берунаи бино азнавсозӣ гардид.
Назарзода Ризо Шодӣ иброз доштанд, ки ин ғамхориҳои Президенти кишвар муҳтарам Эмомалӣ Раҳмон ва раиси шаҳри Душанбе Рутамӣ Эмомалӣ буда, идомаи мантиқии дастгириҳо дар самти соҳаи тарбияи ҷисмонӣ ва варзишгарони мамлакат ба шумор меравад.

- Чанд сол қабл дар ин “Мактаб-интернати тамоюли варзишӣ” шароит он қадар хуб набуд, толорҳо хунук буд, аммо ба ин нигоҳ накарда варзишгарон ба тамрин машғул мегардиданд. Хушбахтона имрӯз ин муиссиса пурра таъмир гардида, бо тамоми шароитҳои замонавӣ муҷаҳаз гардонида шудааст, -дар идомаи суханронӣ афзуд Назарзода Ризо.

Мактаб-интернати варзишӣ соли 1972 ташкил ёфтаааст ва имрӯз дар ин муассиса 350 наврас аз тамоми ҷумҳурӣ ба таълиму тамрин фаро гирифта шудаанд.

Лозим ба зикр аст, ки дар ин даргоҳ варзишгарон, аз қабили Расул Боқиев, Мавзуна Чориева, Дилшод Назаров ва дигарон, ки дар арсаи байналмилалӣ парчами Тоҷикистонро парафшон кардаанд, таълиму тамрин гирифтаанд.