Дар деҳаи Гоҷаки ҷамоати Ғарибшо Шаҳбозови ноҳияи Шуғнон бо иқдоми сокинону ҷавонони ноҳия дар ҳамкорӣ бо мақомоти иҷроияи маҳаллии ҳокимияти давлатии ВМКБ - у Шуғнон Маркази фарҳангӣ – варзишӣ ва рушди барвақтии кӯдакон кушода шуд.

Дар маросими ифтитоҳи он раиси ноҳия Азиз Гиёҳзода, директори Мактаби маълумоти касбӣ ва давомдори Донишгоҳи Осиёи Марказӣ дар ВМКБ Диловар Буттабеков, шоири шинохтаи вилоят Парвонаи Фаррухзод, раиси деҳа Анваршо Шолангаров ва дигар шахсони расмӣ иштироку баромад намуданд.

А. Гиёҳзода таъкид кард, ки воқеан муддатҳои охир кушодашавии марказро хурду бузурги деҳа бесаброна интизор буда, хушбахтона он ба “Соли рушди сайёҳӣ ва ҳунарҳои мардумӣ” рост омад: “Ба туфайли ҷавонону аҳли ҷамоатчигӣ марказ дар муддати кӯтоҳтарин ва бо сифати баланд мавриди баҳрабардорӣ қарор гирифта, итминон аст, ки он дар рушди маънавиёти кӯдакон, тарғиби тарзи ҳаёти солим, фаъолияти шоистаи ҷавонону наврасон ва иттиҳоди мардум нақши муассир мегузорад” – гуфт раиси ноҳия.

Мавриди зикр аст, ки феълан дар дохили марказ як толору утоқи махсус баҳри рушди барвақтии кӯдакон, толори умумӣ бо тарҳи хонаи бадахшонӣ барои 270 нафар ҷои нишаст, ки дар он чорабиниҳои сиёсӣ – фарҳангию маърифатӣ мегузаранд, мавҷуд мебошад. Дар толори варзишии марказ бошад корҳои сохтмонӣ идома ёфта, он низ соли оянда ба истифода дода мешавад.