Дар деҳаи Вахши Ҷамоати деҳоти Истиқлоли ноҳияи Ҷайҳун бо саҳмгузории соҳибкори маҳаллӣ Рустам Қирғибеков майдончаи замонавии болопӯшидаи футболи хурд ба истифода дода шуд.

Иншооти мазкур бо харҷи 450 ҳазор сомонӣ бунёд гардида, минбаъд дар он сокинони маҳал, бахусус ҷавонону варзишгарон бемаҳдудият метавонанд, ба бозии футбол ва машқу тамрин машғул гарданд.

Ба ҳамин монанд як майдончаи варзишии дигар дар деҳаи Телмани Ҷамоати деҳоти Истиқлол аз ҷониби оилаи Ҳиматовҳо бо харҷи 200 ҳазор сомонӣ сохта шуда, мавриди истифодаи ҳамдеҳагонашон қарор дода шуд.
Тибқи иттилои масъулини Бахши кор бо ҷавонон ва варзиш дар ноҳияи Ҷайҳун бахшида ба ҷашни 30-солагии Истиқлолияти давлатӣ бунёди 14 адад иншооти соҳаи варзиш ба нақша гирифта шудааст, ки то имрӯз 7 адади он ба истифода дода шуда, дар иншоотҳои боқимонда корҳои сохтмонӣ идома доранд.