Бо иштироки Вазири корҳои дохилӣ ва роҳбарияти ҳукумати шаҳри Левакант дар кӯчаи Нурулло Абдуллоеви шаҳри мазкур, як майдончаи варзишӣ ифтитоҳ гардид.

Варзишгоҳи мазкур бо ташаббуси Вазорати корҳои дохилӣ ва шуъбаи Вазорати корҳои дохилӣ дар шаҳр барои ҷавонону наврасони шаҳр сохта ба истифода дода шуда, дар шафати майдончаи утоқи кории нозирони минтақавӣ низ мавриди баҳрабардорӣ қарор гирифт. 

Ҳамчунин, вазири корҳои дохилии Ҷумҳурии Тоҷикистон, генерал-полковники милитсия Раҳимзода Рамазон Ҳамро бо зиёда аз 600 нафар ҷавонони шаҳр дар толори қасри фарҳанг вохӯрӣ доир намуда, дар бораи хатари терроризм ва экстремизм дар замони муосир, пешгирии шиддати ифротгароӣ ва рафторҳои номатлуб дар байни ҷавонон, пешгирии нашъамандӣ ва оқибатҳои он, мубориза бар зидди муомилоти ғайри қонунии маводи мухаддир, ки яке аз проблемаҳои муҳими ҷомеаи ҷаҳонӣ ба ҳисоб меравад, ҳамсуҳбат шуд.