Дар доираи сафари кории раиси Вилояти Мухтори Кӯҳистони Бадахшон Мирзонабот Алишер Худоберди дар деҳаи Хасхоруғи ҷамоати деҳоти Андароби ноҳияи Ишкошим майдончаи варзишии замонавӣ ба истифода дода шуд.

Иншооти мазкур дар доираи таҷлили ҷашни бузурги миллӣ - 35-солагии Истиқлоли давлатӣ бо ибтикори мақомоти иҷроияи ҳокимияти давлатӣ бунёд гардид.

Зимнан, раиси вилоят Мирзонабот Алишер Худоберди сокинони ҷамоатро бо Рӯзи забони давлатӣ ва Рӯзи омӯзгорон табрик намуда, ифтитоҳи иншооти мазкурро туҳфаи арзанда барои оммавигардонии варзиш маънидод намуд.

Раиси вилоят Мирзонабот Алишер Худоберди аз дастовардҳои муҳими иқтисодию иҷтимоии вилоят, аз ҷумла дар марҳилаи нави рушд ёдоварӣ намуда, таъкид кард, ки чунин пешравиҳо ба як сол маҳдуд нагардида, минбаъд бо сурату сифати нав идома бахшида мешавад.

Сокинони ҷамоат аз дастовардҳои соҳаҳои гуногуни хоҷагии халқ изҳори қаноатмандӣ намуда, миннатдории худро ба Ҳукумати Ҷумҳурии Тоҷикистон, хосса Пешвои муаззами миллат муҳтарам Эмомалӣ Раҳмон баён намуданд.

С. ҶАНОБИЛШОЕВ, “ҶТ”