Бо иқдому дастгирии президенти Федератсияи футболи Тоҷикистон Рустами Эмомалӣ дар маҳаллаи Теми шаҳри Хоруғ майдончаи нави футболбозӣ мавриди баҳрабардорӣ қарор гирифт.

Дар маросими кушодани майдонча раиси Вилояти Мухтори Кӯҳистони Бадахшон Ёдгор Файзов, ноиби президенти федератсия Алишер Урунов, муовинони раиси шаҳр, роҳбарияти Раёсати кор бо ҷавонон ва варзиши вилоят иштироку баромад карда, варзишгарону ҷавонони Хоруғро ба ин муносибат табрику таҳният намуданд.

Зикр гардид, ки чунин корҳои ободониву созандагӣ бевосита бо дастуру супоришҳои Асосгузори сулҳу ваҳдати миллӣ - Пешвои миллат муҳтарам Эмомалӣ Раҳмон рӯи кор омада, хоса баҳри беҳбудии қишри ояндасози миллат фароҳам оварда шудаанд.

Феълан дар ҳудуди маркази ВМКБ бо дастгирии президенти федератсия се майдончаи варзшӣ ба истифода дода шуда, ду майдончаи дигар то фасли баҳори соли 2020 мавриди баҳрабардорӣ қарор хоҳанд гирифт.

Баҳри чунин ғамхориҳо ҷавонону варзишгарони Хоруғ миннатдории самимии худро ба Пешвои миллат муҳтарам Эмомалӣ Раҳмон ва президенти Федератсияи футболи Тоҷикистон Рустами Эмомалӣ самимона баён намуданд.