Ба ифтихори “Соли ҷавонон” дар ҷамоати Рангкӯли ноҳияи Мурғоб толори муосири варзишӣ барои намудҳои гуногуни гӯштин мавриди баҳрабардорӣ қарор гирифт.

Барои сохтмони толори мазкур беш аз 28 ҳазор сомонӣ маблағ ҷудо гардида буд ва он дар муддати кӯтоҳтарин мавриди истифодабарӣ қарор гирифт. Мурзабай Ҷоошбаев, раиси ноҳияи Мурғоб, варзишгарон, ҷавонону наврасонро бо кушодашавии ин толор табрик намуда афзуд, ки “Барои рушди варзиш, солимии наслҳои имрӯзу фардо Ҳукумати кишвар бо шарикони наздикаш пайваста шароиту имкониятҳоро фароҳам меорад. Бинобар ин, ҷавонон бояд ҳаматарафа талош намоянд, то ба натиҷаҳои комил бирасанд”.

Баъди анҷоми барномаи рангини консертӣ, ки аз ҷониби ҷавонон ва сарояндагони ноҳия таҳия гардида буд, мусобиқаҳои варзишӣ аз рӯи гӯштину волейбол доир шуд.
Ғолибони мусобиқаҳои варзишӣ аз тарафи мақомоти маҳаллӣ, раисони ҷамоатҳои деҳот ва Бахши кор бо ҷавонон ва варзиш бо туҳфаҳои хотиравӣ ва мукофотпулӣ қадрдонӣ гардиданд.

Машҳур ИМОМНАЗАРОВ, “ҶТ”