Ба ифтихори 30 - солагии Истиқлолияти давлатии Ҷумҳурии Тоҷикистону “Солҳои рушди деҳот, сайёҳӣ ва ҳунарҳои мардумӣ” дар ноҳияҳои Рӯшону Роштқалъа бо иштироки раиси ВМКБ ва муовини раиси Маҷлиси миллии Маҷлиси Олии Ҷумҳури Тоҷикистон Ёдгор Файзов, вазири Вазорати энергетика ва захираҳои оби кишвар Усмоналӣ Усмонзода як қатор иншоотҳои варзишӣ мавриди баҳрабардорӣ қарор гирифтанд.

Азҷумла, дар деҳаи Шоди ҷамоати Тавдеми Роштқалъа, мавзеи Бидизи поён ва МТМУ № 22 – и ҷамоати Мирсаид Миршкари ноҳия се толори муосири варзишӣ барои машқу тамрини каратэ киёкушикай, гӯштини тарзи миллию дзюдо ва волейболу теннисбозӣ ба истифода дода шуда, дар деҳаи Қалъаи ҷамоати Роштқалъа бошад, майдончаи нави футболбозӣ бо маблағгузории зиёда аз 60 ҳазор сомонии вазорат ифтитоҳ ёфт.

Инчунин дар деҳаи Дерзуди ҷамоати Назаршо Додихудоеви ноҳияи Рӯшон бо маблағи зиёда аз 80 ҳазор сомонӣ аз тарафи соҳибкорони маҳаллӣ майдончаи муосири футболбозӣ барои ҷавонону наврасон сохта ба истифода дод шуд.

Мавриди зикр аст, ки сохтмони чунин иншоотҳо дар тамоми шаҳру ноҳияҳои вилоят босуръат идома дорад.