Дар пайи иваз шудани сармураббии тими миллӣ ва чанде аз бошгоҳҳои кишвар бошгоҳи “Истиқлол”-и Душанбе ҳам сармураббии худро иваз кард.

Тавре varzishtv.tj хабар додааст, сармураббии нави тими “Истиқлол”-и Душанбе мутахассиси 46-солаи сербӣ - Никола Лазаревич мебошад.

Муҳлати шартномаи ҳамкорӣ бо мураббӣ як солро дар бар мегирад. Лазаревич дар ин маснад Игор Черевченкоро иваз кард, ки дастаи шаҳри Душанберо дар мавсими гузашта тамрин медод.
Роҳбарияти қаҳрамони бисёркаратаи кишвар бо тавсияи сармураббии нав ба ӯ ёрдамчиёнашро низ таъин намуд.

Инҳо ҳамватанони Лазаревич - Предраг Пешич ва Ҷорҷи Коралич мебошанд. Ҳамчунин Лазаревичро дар “Истиқлол” собиқ сарвони даста Дилшод Восиев кумак хоҳад кард. Корашро бо дарвозабонҳо мутахассиси рус Дмитрий Тяпушкин идома медиҳад.

Никола Лазаревич, 29 январи соли 1978 дар Сербия таваллуд шуд, дорандаи литсензияи мураббигии Pro мебошад.

Ҳамчун мураббӣ дар клубҳои “Раднички” (Сербия), “Шенжен”, БСУ (ҳарду Чин), “Ал-Таавун” (Арабистони Саудӣ) ва КФ “Кизилқум”-и Узбекистон фаъолият кардааст.

Илова бар ин, Лазаревич солҳои пеш дар "Истиқлол" ва мунтахаби миллии Тоҷикистон вазифаи мураббии омодагии ҷисмониро иҷро мекард.

Никола Лазаревич дар вақти таҳсил барои ба даст овардани литсензияи мураббигии Pro дар клубҳои аврупоӣ, ба монанди “Атлетико” (Мадрид), “Копенгаген” (Дания), “Зенит” (Санкт-Петербург) ва “Базел”-и Швейтсария таҷрибаомӯзӣ кардааст.