ВАРЗИШ
Чоршанбе 28 Феврал 2024 08:25
9676
Интихоби риштаи дурусти варзиш аксаран ба варзишгар шарафу иқболи беандоза меорад. Муҳим нест, варзишгар дар кадом ришта тамрин мекунад, муҳим он аст, ки ӯ то кадом андоза ба риштаи интихобкардааш меҳру муҳаббат меварзад.

Қаҳрамони интихобкардаи мо - Ҷаҳонгир Тоиров ҳам сараввал дар риштаҳои дигари варзиш худро месанҷид. Ӯ аз замоне, ки дуруст қадам заданро омӯхт, машғул шуд ба тамрини футбол. Дар замираш, ки хунсардиву зӯрибозуозмоӣ буд, аз 13-солагӣ бо футбол хайрухуш намуду ба тамрини бокс пардохт. Ӯ то 16-солагӣ дар самти бокс тамрин кард. Баъдан ба хулосае омад, ки баробари омӯхтани усулҳои бокс бояд аз усулҳои гӯштин ҳам бохабар бошад. Ҳамин тавр, Ҷаҳонгир Тоиров тӯли се сол усулҳои гӯштини юнону румиро, ки варзишгарро аз ҳар ҷиҳат обутоб медиҳад, аз худ кард. Дар ин роҳ ӯро мураббии кордони ин самти гӯштин Беков Фаррух роҳнамо буд.

Сар аз соли 2013 маҳорати муштзаниву гӯштингирии Ҷаҳонгир аз назари Аҳтам Хокиров дур намонд. Ҷаҳонгир, ки аз хурдӣ роҳи хешро дар масири варзише мекофт, ки ӯро ба қуллаи мақсуд расонад, билохир пайдо намуд. Толори самбои муҳорибавӣ дигар ба хонаи дуввуми варзишгар табдил ёфта буд. Чун Ҷаҳонгир ҳам аз усули бокс ва ҳам аз усули гӯштингирӣ бохабар буд, зуд ба мусобиқаҳои байналмилалӣ роҳ ёфт.

Моҳи ноябри соли 2017 шаҳри Оши Ҷумҳурии Қирғизистон макони баргузории Гран При оид ба самбои муҳорибавӣ интихоб шуд. Қатори дигар варзишгарони тими мунтахаби Тоҷикистон Ҷаҳонгир Тоиров ҳам ба ин мусобиқаи байналмилалӣ сафарбар гашт. Бо роҳбарии Аҳтам Хокиров дастаи Тоҷикистон ба ин ҷо сафарбар шуд. Дар ин мусобиқаи бонуфуз варзишгарони кишвар дар рақобатҳои инфиродӣ соҳиби 8 нишон - 3 нишони тилло, 2 нуқра ва 3 биринҷӣ гардиданд. Муаллифи яке аз нишонҳои тилло Ҷаҳонгир Тоиров буд, ки ӯ бо шикаст додани 2 рақиб (Санҷар Қодиров - Узбекистон ва Сангал Жапаров - Қирғизистон) барандаи медали тилло гашт. Дар он мусобиқа маҳорати Ҷаҳонгир ҳамто надошт, чун ӯ ҳунарашро ҳам дар рост истода ҷангидан ва ҳам дар замин (партер) ба таври аъло нишон дод. Ва ин аввалин медали тиллои Ҷаҳонгир дар корномааш аз мусобиқоти байналмилалӣ маҳсуб мешуд.

Мусобиқоти ММА миёни варзишгарони касбӣ моҳи марти соли 2019 дар Ҷумҳурии Доғистони Русия доир гашт. Ин мусобиқа варзишгарони касбии ММА-ро барои дар-ёфти камарбанди каҳрамонӣ гирди ҳам оварда буд. Дар ин мусобиқа 350 варзишгар аз кишварҳои Русия, Қазоқистон, Узбекистон, Қирғизистон, Беларусия, Украина ва Тоҷикистон миёни ҳам дар вазнҳои гуногун ба ҳашткунҷа баромаданд. Дар вазни то 65 кг Чаҳонгир Тоиров баромад намуда, рақибони хешро яке дунболи дигаре ба накаут равон мекард. Дидори аввалаш бо намоянда аз кишвари Беларус Виктор Дмитрий буд, ки рақибро дар дақиқаҳои охири пайти аввал бо усули лат додани даст таслим кард. Дар қисмати финалӣ бошад, қаҳрамони мо намояндаи Русия - Абулаиб Кулиевро тариқи буғӣ кардан, шикаст дода, шаҳди ғолибият нӯш карду соҳиби камарбанди чемпионӣ гардид.

Набарди қаҳрамонҳои ҷаҳон оид ба греплинг. Чунин ном дошт мусобиқае, ки моҳи феврали соли 2021 дар шаҳри Москави Федератсияи Русия доир гашт. Аз ҷиҳате, ки греплинг шабоҳат ба як шохаи муҳорибаҳои омехта (ММА) аст, миёни варзишгарони ҷаҳон, хамчунин, дастпарварони тоҷикистониро ҳам шомил карданд. Ҷаҳонгир ин навбат бо вазни қаблии хеш, яъне 68 кг баромад намуда, аз навъи греплинг ҳам қувваи худро санҷид. Аз сабабе ки Ҷаҳонгир марди майдондидаи ММА буд, баромад дар греплинг барояш ҳамсони об хӯрданро мемонд. Ӯ дар ин дидор 3 ҳарифи худро мағлуб намуда, зинаи аввалро касб кард. Ӯ дар дидори аввал Ҳасан Халмирови доғистонӣ, баъдан Акбар Тошеви узбек ва дар қисмати финалӣ Игор Максими русро мағлуб намуда, соҳиби камарбанд шуд. Дастовард аз мусобиқаи греплинг, камарбанди дуюми Ҷаҳонгир аз мусобиқоти байналмилалӣ маҳсуб мешуд.

Яҳё МАҲМАДНАБИЕВ,“ҶТ”

Эзоҳи худро нависед



Рамзҳо дар расм