Дар толори хурди мақомоти иҷроияи ҳокимияти давлатии шаҳри Истаравшан маросими ҷоизасупорӣ ба дастаи “Садовая” – и шаҳр ҷоизадори медали биринҷии чемпионати Ҷумҳурии Тоҷикистон оид ба футзал серияи PRO баргузор гардид.

Баҳром Иноятзода, раиси шаҳри Истаравшан, нахуст аз номи роҳбарияти шаҳр ғолибонро муборакбод намуда, афзуд, ки соли 2017 бо дастгирии мақомоти иҷроияи ҳокимияти давлатии шаҳр ва соҳибкорони маҳаллӣ варзишгарон дар чемпионати Ҷумҳурии Тоҷикистон оид ба футзал серияи PRO  иштирок намуда, аз байни 8 даста сазовори ҷойи 5 –ум гардида, соли 2018 бошад, сазовори ҷойи 3-юм шуд.

Сипас, Алишер Ӯрунов, ноиби Президенти Федератсияи футболи мамлакат баромад намуда, ғолибияти дастаи “Садовая”-ро муваффақияти бузург барои футболи шаҳр донист.

Бозингари даста Баҳодур Хоҷаев дар соли 2018 бо унвони “Беҳтарин нишонзани соли 2018” эътироф гардид.

Дар охири чорабинӣ ба ғолибон медал ва ифтихорномаи Федератсияи футболи Тоҷикистон ва ба сарпарастон сипосномаи мақомоти иҷроияи ҳокимияти давлатии шаҳри Истаравшан тақдим карда шуданд.