ВАРЗИШ
Чоршанбе 14 Апрел 2021 10:23
7907
Бегоҳии 28 март дар Фурудгоҳи байналмилалии шаҳри Душанбе варзишгари шинохта ва самбочии маъруфи тоҷик Хушқадам Хусравовро, ки аз мусобиқаи байналмилалии Ҷоми ҷаҳонии самбо “Ёдбуди Анатолий Харлампиев-2021” бо медали тилло ба ватан баргашт, бо тантана истиқбол гирифтанд.

Дар маросими пешвозгирӣ Абдулло Раҳмонзода, раиси Кумитаи кор бо ҷавонон ва варзиши назди Ҳукумати кишвар, Мавсума Муинӣ, муовини раиси шаҳри Душанбе, Шоҳзод Раҳимзода, сардори Раёсати кор бо ҷавонон ва варзиши шаҳри Душанбе, ҳайати роҳбарикунандаи Вазорати мудофиа, намояндагони дигар вазорату идораҳо, наздикону пайвандон ва беш аз 300 нафар мухлисон ҳузур доштанд.

Дар суҳбати кӯтоҳе, ки зимни вохурӣ баргузор гардид, гуфта шуд, ки медали ба дастовардаи Хушқадам Хусравов барои варзиши тоҷик натиҷаи хуб аст ва ҷавонону наврасони шавқманди варзишро таҳрик медиҳад, ки бештар рӯ ба варзишу солимӣ биоранд.

Хушқадам низ дар суҳбати кӯтоҳе бо рӯзноманигорон гуфт, ки медали бадастовардааш натиҷаи дастгириҳои Ҳукумати кишвар ва роҳбарияти олии мамлакат аст.

Қобили зикр аст, ки Хушқадам Хусравов 25- уми марти соли равон дар мусобиқаи байналмилалии Ҷоми ҷаҳонии самбо “Ёдбуди Анатолий Харлампиев-2021”, ки дар шаҳри Маскав баргузор гардид, то даври финалӣ бар ҳама ҳарифони худ ғолиб омада, барои дарёфти мақоми аввал ва медали тилло сабқати ҳалкунандаи худро бо намояндаи Ҷумҳурии Ӯзбекистон - Ҳомидҷон Муминов доир намуд. Дар рақобати ниҳоӣ низ Хушқадам бар ҳарифи худ дастболо гардида, маротибаи дуюм барандаи Ҷоми ҷаҳонии Харлампиев гардид.

Хушқадам аввалин нафаре мебошад, ки дар таърихи самбои тоҷик ду маротиба ба гирифтани медали тиллои ин мусобиқаи байналмилалӣ даст ёбад.

Ӯ ҳамчунин устоди варзиши дараҷаи байналмилалӣ, дорандаи медали тиллои Ҷоми ҷаҳон 2015 (Москва), қаҳрамони вазни 62 кг дар Чемпионати ҷаҳон 2018 (Бухарест), панҷ карат қаҳрамони риштаи самбои Чемпитонати Осиё мебошад.

Қиёмиддин МАҲМАДҶОНОВ
“ҶТ”

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
29 30 31 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 1 2

Апрел 2021 c.