Дастаи чемпиони Лигаи олии футболи Тоҷикистон – “Истиқлол”-и Душанбе бозии хотимавии омодагӣ ба мусобиқаи марҳилаи интихобии Лигаи чемпионҳои Конфедератсияи футболи Осиё (КФО)-2020-ро бо тими “Локомотив”-и Тошканд дар шаҳри Гулистон баргузор мекунад.

Сомонаи расмии Федератсияи футболи Тоҷикистон ба пахши ин хабар менависад, ки футболбозони дастаи “Истиқлол” рӯзи 6-уми январ ба шаҳри Гулистони вилояти Суғд рафтанд ва давоми ду ҳафтаи тамрин дар вилояти Суғд дар маркази таълимие, ки ба Бонки миллии Тоҷикистон марбут аст, иқомат хоҳанд дошт.

Тибқи нақша дар ин давра дастаи “Истиқлол” бо ду дастаи Лигаи олии Ӯзбекистон – “Қӯқанд-1912” (9-уми январ) ва чемпиони Ӯзбекистон – “Пахтакор”-и Тошканд” (13-уми январ) бозиҳои санҷишӣ мегузаронанд.

Мавриди ёдоварист, ки бозии даври дуюми марҳилаи интихобии Лигаи чемпионҳои КФО-2020 байни дастаҳои “Истиқлол” ва дорандаи медалҳои нуқраи чемпионати Ӯзбекистон – “Локомотив”-и Тошканд рӯзи 21-уми январ дар Тошканд баргузор хоҳад гашт ва дар ин давр танҳо як бозӣ сурат хоҳад гирифт.

Барои роҳ ёфтан ба даври гурӯҳии мусобиқаи Лигаи чемпиоанҳои КФО-2020 ба ба дастаи футболбозони “Истиқлол” зарур аст, ки ду бор ғолибият ба даст орад. Дар навбати аввал дастаи “Локомотив”-ро мағлуб созад ва дар давраи плей-офф бар дастаи “Ал-Аҳлӣ”-и Арабистони Саудӣ низ пирӯз шавад.