22-юми феврал дар Варзишгоҳи марказии шаҳри Душанбе мусобиқаи ниҳоӣ ё худ финали Ҷоми Федератсияи футболи Тоҷикистон дар соли 2025 баргузор гардид.

Ду дастае, ки дар финали мусобиқа байни ҳам рақобат карданд, дастаҳои шаҳри Душанбе – “Истиқлол” ва “КМВА” буданд. Вохӯрии мазкур бо ҳисоби 2 бар 0 ба фоидаи дастаи “Истиқлол” анҷом ёфт.

Бошгоҳи "Истиқлол" пас аз ин пирӯзӣ номи худро бори ҳафтум ҳамчун қаҳрамони мусобиқаи Ҷоми ФФТ сабт сохт. Ин даста, ҳамчунин, қаблан солҳои 2014, 2015, 2017, 2018, 2019 ва 2021 ғолиби мусобиқаи мазкур шуда буд.

Дастаи “КМВА” пас аз шикаст нишонҳои нуқраи мусобиқаи мазкурро ба даст овард. Медалҳои биринҷии мусобиқа бошад, насиби бошгоҳи "Панҷшер" гардид. Ин бошгоҳ барои ба даст овардани мақоми сеюм бо дастаи "Сомон" рақобат карда, онро шикаст дод.

Бошгоҳи “Истиқлол” дар баробари Ҷом, ҳамчунин, соҳиби мукофотпулӣ дар ҳаҷми 50 ҳазор сомонӣ гардид. Ғолиби медали нуқра бо 30 ҳазор сомонӣ ва барандаи медали биринҷӣ бошад, бо 20 ҳазор сомонӣ қадрдонӣ гардиданд.

Ҳ. РАҲМАТУЛЛОЕВ, “ҶТ”