Дастаи “Истиқлол”-и шаҳри Душанбе, қаҳрамони шашкаратаи Тоҷикистон дар доираи бозии ҷавобии марҳилаи ниҳоии байниминтақавии Ҷоми КФО (Конфедератсиони футболи Осиё)-2017 бо тими “Бенгалуру”-и Ҳиндустон мусовӣ, 2-2 намуда, аз рӯи натиҷаҳои ду бозӣ бо ҳисоби 3:2 пирӯз гардида ба финали Ҷоми КФО-2017 баромад. Ин рақобат шоми имрӯз, 18-уми октябр дар варзишгоҳи «Кантерава»-и шаҳри Бангалори Ҳиндустон баргузор шуд.

Ҳисобро Нуриддин Давронов дар дақиқаи 4-уми бозӣ аз ҷаримаи 11-метра ё пеналтӣ боз кард. Баъд аз 20 дақиқа Бҳеке Раҳул, бозигари “Бенгалуру”, тӯбро бо зарбаи сар ба дарвозаи меҳмонон ворид намуд. Ҳамин тавр, нимаи аввали дидор бо натиҷаи мусовии 1:1 хотима ёфт.

Дар дақиқаи 57-уми сабқат, футболбозони тоҷик бо як бозисозии хуб тавонистан, маротибаи дуюм дарвозаи рақибро рахна намоянд. Ин голро Дмитрий Барков, легионери “Истиқлол”, ба номаш сабт намуд. Пас аз ҳашт дақиқаи рақобат ҳимоятгари дастаи “Истиқлол” Александр Стетсенко дар назди дарвозааш қоидаро вайрон намуд ва довари бозӣ зарбаи 11 метра таъин намуд. Тӯбро аз ҷаримаи 11-метра Чҳетри Сунил ба ҳадаф расонд.

Ёдовар мешавем, ки тими “Истиқлол” дар дидори аввал, ки 27-уми сентябр дар Варзишгоҳи марказии Ҳисор доир гардида буд, бо ҳисоби 1:0 ғалаба намуда буд.

Бозии ниҳоии Ҷоми КФО-2017 рӯзи 4-уми ноябр дар Тоҷикистон барпо мегардад. Дар ин рӯз тими “Истиқлол” (Тоҷикистон) дастаи “Эйр Форс”-и (Ироқ)-ро дар майдони худ қабул менамояд.

Маврид ба зикр аст, ки дастаи “Истиқлол” бори аввал соли 2015-ум дар бозии ниҳоии Ҷоми КФО аз дастаи “Ҷоҳор Дарул Таъзим”-и Малайзия бо ҳисоби 0:1 мағлуб шуда буд. Ин бозӣ 31-уми октябр дар Варзишгоҳи марказии шаҳри Душанбе бо ҳузури 18 ҳазор мухлис барпо гардида буд.