Пас аз танаффуси якуниммоҳаи тобистона дастаҳои лигаи олии кишвар оид ба футбол боз сабқатро шуруъ намуданд.

Дар ин танаффус дастаҳо хариду фурӯши тобистонаро аз сар гузаронида, ҳайаташонро бо бозингарони ҷадид комил намуданд.

Даври дувоздаҳуми қаҳрамонии кишвар оид ба футбол рӯзи 28-уми июн бо рақобати дастаҳои “Кӯктош”-и ноҳияи Рӯдакӣ - ССКА “Помир”-и Душанбе ва “Панҷшер”-и ноҳияи Ҷалолиддини Балхӣ - “Хатлон”-и шаҳри Бохтар оғоз ёфт.

Рақобати авввал миёни дастаҳои “Кӯктош”-и ноҳияи Рӯдакӣ - ССКА “Помир”-и Душанбе дар варзишгоҳи “Нефтяник”-и ноҳияи Рӯдакӣ ҷараён гирифта, бо ҳисоби 2-1 ба поён расид.

Зиёда аз 3 ҳазор мухлис, ки барои дастгирии дастаҳои дӯстоштаашон омада, дар ҳарду қисми бозӣ шоҳиди гол гардиданд. Аз дақиқаи 2-юми дидор рақобат барои меҳмонон душвор шуд, дар ин вақт Меҳроҷиддин Музаффаров футболбози дастаи “Кӯктош” ҳисобро боз намуда, бошгоҳашро пешсаф намуд. Футболбозони душанбегӣ дар дақиқаи 31-ум бо голи задаи Доробҷон Эргашев ҳисоби бозиро мусовӣ намуданд. Барои дастпарварони ССКА “Помир”-и шаҳри Душанбе қисми дуюм нобарор анҷом ёфт. Муҳиддин Одилов ҳамлагари тими “Кӯктош” дар оғози қисми дуюм голи ҳалталаби дастаашонро ба сомон расонида, ғалабаи дастаашро таъмин намуд.

Дар дидори дигар тими “Панҷшер”-и ноҳияи Ҷалолиддини Балхӣ “Хатлон”-и шаҳри Бохтарро дар майдони худ пазируфт. Ин рақобат мусовӣ, бо ҳисоби 1-1 ба поён расид.

Голи нахустинро Наимҷон Иброҳимзода ҳимоятгари тими “Хатлон” дар дақиқаи 48-ум ба номаш муҳр зад. Футболбозони дастаи “Панҷшер” дар сонияҳои охири қисми дуюм ҳисоби бозиро мусовӣ намуданд. Тӯби мизбононро ҳимоятгар Алишери Ҳотам вориди дарвозаи Фатҳулло Бобоев кард.

Бозии марказии ин давр рӯзи 29-уми июн доир гардид. Ин навбат садрнишини мусобиқа бошгоҳи “Истиқлол”-и шаҳри Душанбе дар меҳмонӣ тими “Регар-ТадАЗ”-и шаҳри Турсунзодаро бо ҳисоби 2-1 шикаст дод.

Ҳарчанд дар қисми аввали бозӣ барои дастпарварони Муҳаммадҷон Ҳабибуллоев, сармураббии дастаи “Регар-ТадАЗ” аз зарбаи ҷаримавии 11-метра имконияти кушодани ҳисоби бозӣ муҳаё гардида бошад ҳам, комёб нагардиданд. Наврӯз Рустамов дар дақиқаи 16-ум зарбаи 11-метраро ба ҳадаф расонида натавонист.

Дар Варзишгоҳи “ТАЛКО-Арена”-и шаҳри Турсунзода зиёда аз 3 ҳазор мухлис муштоқи дидани гол буданд. Қисми дуюм тақдири ҳарду дастаро ҳал намуда, мухлисон шоҳиди се гол гардиданд. Бояд гуфт ҳарсеа голро футболбозони як даста ба самар расониданд. Дилшод Восиев, сардори дастаи “Истиқлол” дар дақиқаи 77-ум бо сар тӯби аввали дидорро вориди тури Рустам Ризоев кард. Пас аз 6 дақиқа аз зарбаи стандартӣ Сиёвуш Асроров ҳимоятгари душанбегиҳо ба дарвозаи худ тӯбро ворид намуд. Голи ғалабаоваро дар дақиқаи 87-ум ҳамлагари ҷавони бошгоҳи “Истиқлол” Шериддин Бобоев ба номи худ сабт кард.

Дастпарварони “Хуҷанд”-и шаҳри Хуҷанд, ки ин мавсим яке аз довталабони асосии каҳрамонии мусобиқаи мазкур ҳисобида мешаванд, дар майдони худ тими “Барқчӣ”-и шаҳри Ҳисорро бо ҳисоби 3-1 мағлуб намуданд.

Пас аз натиҷагирии даври 18-уми чемпионати кишвар дар ҷадвали мусобиқа тими “Истиқлол”-и шаҳри Душанбе бо касби 29 имтиёз дар ҷои аввал мебошад. Дастаи “Хуҷанд”-и шаҳри Хуҷанд бо 27 хол дар мавқеи дуюм қарор дорад. Бошгоҳи “Кӯктош” - и ноҳияи Рӯдакӣ бо 18 имтиёз дар зинаи сеюм меистад.