Дастаи “Истиқлол”-и Душанбе бори дигар тавонист қудрати худро дар чемпионати кишвар исбот намояд ва пеш аз анҷоми мусобиқа унвони қаҳрамонии Тоҷикистонро дар мавсими 2025 соҳиб гардад.

Шоми дирӯз, пас аз анҷоми бозии даври 19-уми Лигаи футболи Тоҷикистон бо тими “Вахш” дар Варзишгоҳи марказии мамлакат, ки бо ҳисоби 1:1 поён ёфт, натиҷаи умумии ҷадвали мусобиқа имкон дод, ки “Истиқлол” пешопеш аз дигар дастаҳо ба қуллаи футболи кишвар барояд. Бо ба даст овардани ин имтиёзҳои ҳалкунанда, даста мавқеи дастнораси худро дар садри ҷадвал мустаҳкам намуд ва расман қаҳрамон шуд.

Ин дастоварди навбатӣ барои тим таърихан хеле муҳим аст, зеро “Истиқлол” 14-умин унвони қаҳрамонии худро дар чемпионати Тоҷикистон ба даст овард. Пештар даста дар солҳои 2010, 2011, 2014, 2015, 2016, 2017, 2018, 2019, 2020, 2021, 2022, 2023 ва 2024 низ қаҳрамони мамлакат шуда буд. Ҳамин тариқ, намояндаи пойтахт мавқеи худро ҳамчун тиме, ки солҳои охир дар футболи Тоҷикистон ҳукмрон аст, боз ҳам устувортар намуд.

Дар давоми мавсим шогирдони Игор Черевченко бо бозии устувор, ҳамоҳангӣ дар ҳама хатти майдон ва руҳияи баланди рақобатӣ тавонистанд дар аксарият вохӯриҳо натиҷаҳои дилхоҳ ба даст оранд.

Яҳё МАҲМАДНАБИЕВ, “ҶТ”