Бо мақсади рушди футбол дар деҳот ва ҷалби ҳарчи бештари наврасону ҷавонон ба ин риштаи варзиш дар ҷамоати Даҳанаи шаҳри Кӯлоб байни дастаҳои деҳаю маҳаллаҳо мусобиқаи футбол баргузор шуд.

Мусобиқаи мазкур миёни 12 дастаи наврасони солҳои таваллуди 2000 - 2002 давоми панҷ рӯз баргузор гардид.

Бар асоси дастури мусобиқа дастаҳо ба ду зергурӯҳ тақсим гардида, чор дастаи пешсаф ба даври ниманиҳоӣ роҳ ёфт. Дар даври ниҳоӣ дастаҳои футболи деҳаҳои Танёл ва Файзобод бо ҳам вориди майдон гардиданд ва дар ин дидор футболбозони навраси дастаи Танёл ғолиб омада, қаҳрамони мусобиқа дониста шуд.

Дар фарҷоми мусобиқа дастаҳои ғолиб аз ҷониби дастандаркорон бо медалу ифтихорнома, сару либос ва лавозимоти варзишӣ сарфароз гардонида шуданд.

Бинобар иттилоъи сардовари мусобиқа ба хотири рушди футбол минбаъд дар дурдасттарин маҳаллаву деҳоти минтақа бо ширкати наврасону ҷавонон чунин чорабиниҳои варзишӣ баргузор мегардад.