10 август зимни як чорабинии муҳташам 90 варзишгар ва кормандони соҳаи варзиш аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон бо мукофоту унвонҳои варзишӣ қадрдонӣ шуданд.

Дар чорабинӣ, ки бахшида ба 10-уми август Рӯзи варзишгарони Тоҷикистон ташкил шуда буд, Абдулло Раҳмонзода, раиси Кумитаи кор бо ҷавонон ва варзиш, Дилшод Назаров, муовини раиси КҶВ, Носир Бозоров, сардори Раёсати тарбияи ҷисмонӣ ва рушди варзиши КҶВ ва варзишгарону собиқадорони соҳа иштирок доштанд.

Абдулло Раҳмонзода, раиси Кумитаи кор бо ҷавонон ва варзиши назди Ҳукумати кишвар зимни суханронии худ тамоми варзишгарони кишварро бахшида ба Рӯзи варзишгарони Тоҷикистон табрику муборакбод намуда, гуфт, вазифаи асосии мо ин пеш аз ҳама қадрдонӣ кардани шумо-варзишгарон мебошад.


 - Шумо варзишгарон парчамбардори ин миллат ҳастед. Бояд имрӯз бо истифода азимкониятҳои мавҷуда ҳарчи бештар кӯшиш намоед, то Тоҷикистонро дар ҷаҳон муаррифӣ намудаву ҳарчи бештар ҷоизаҳоро ба кишвар оред. Зеро на ҳама давлату миллат шароити мавҷудаи моро дорад,- афзуд, раиси кумита.

Баъди суханронии Абдулло Раҳмонзода як қатор кормандони соҳаи тарбияи ҷисмонӣ ва варзиши кишвар барои саҳми арзанда гузоштан дар соҳа бо сипосномаҳо, инчунин 90 варзишгару устодони варзиш бо ифтихорномаву сипоснома, унвони “Устоди варзиши Ҷумҳурии Тоҷикистон” ва дигар ҷоизаҳо қадрдонӣ гардиданд.

Пас аз тақдими сипосномаву ифтихорномаҳо раиси кумита як бори дигар аз хизмати варзишгарону кормандони соҳа ёдовар шуда, ба эшон барои боз ҳам ҷиддитар машғул будан ба варзиш маслиҳат доданд.