ВАРЗИШ
Душанбе 06 Феврал 2023 08:50
5503
22 феврал дар Кумитаи миллии олимпии Тоҷикистон ҷаласаи навбатии гурӯҳи корӣ оид ба омодагӣ ба Бозиҳои олимпии Токио-2020 баргузор гардид.

Дар оғози ҷаласа муовини аввали раиси Кумитаи кор бо ҷавонон ва варзиш Назарзода Ризо ҳамаи мутахасиссони соҳаи варзишро бо Рӯзи Артиши миллии кишвар табрик намуда, иброз дошт, ки бахшида ба 26 - солагии таъсисёбии Қувваҳои мусаллаҳи Ҷумҳурии Тоҷикистон, 23-юми феврал дар ҷумҳурӣ 521 чорабинии варзишӣ баргузор мегардад. Инчунин дар ин рӯз маросими кушодашавии мусобиқаи футболи хурд барои дарёфти “Ҷоми журналистони ҷавон - 2019” ба нақша гирифта шудааст. Мусобиқа бахшида ба Рӯзи матбуоти тоҷик бори аввал бо иқдоми Кумитаи кор бо ҷавонон ва варзиш сурат мегирад ва дар он 16 дастаи расонаҳои хабарӣ ширкат менамоянд.

Баъдан, гузориши сармураббиёни дастаҳои мунтахаби гӯштини юнонӣ-римӣ, ҳандбол, акробатикаи варзишӣ ва бадминтон шунида шуд.

Сармураббии дастаи мунтахаби Тоҷикистон оид ба гӯштини юнонӣ-римӣ Фаррух Беков ин намуди гӯштинро аз қадимтарин намудҳои варзиш дониста, иброз намуд, ки гӯштини юнонӣ-римӣ дар солҳои 50-уми асри гузашта дар кишвари мо пайдо шуд. Айни ҳол дар ҷумҳурӣ 1500 варзишгар ба ин намуди варзиш машғул буда, ба онҳо 60 мураббӣ таълим медиҳанд.

Дастаи мунтахаби Тоҷикистон дар ҳайати Исломиддин Мазитов (60кг), Мубинҷон Ахмедов (67кг), Ҳабибҷон Зуҳуров (77кг), Тоҳирҷон Охунов (87кг), Бобоҷон Мирзораҳимов (97кг) ва Азмуддин Ваҳобов (130кг) барои иштирок дар мусобиқаҳои байналмилалӣ ҷиҳати дарёфти роҳхат ба Бозиҳои олимпии Токио-2020 омодагӣ мебинанд.

Варзишгарони моро зарур аст, ки дар мусобиқаҳои байналмилалӣ, аз ҷумла дар чемпионати Осиё, ки 23-28 апрел дар Ҷумҳурии Мардумии Чин доир мегардад, ширкат намоянд. Инчунин, дар Чемпионати ҷаҳон, ки аз 14 то 22 сентябр дар Ҷумҳурии Қазоқистон баргузор мешавад, иштироки варзишгарони мо хеле зарур аст, чун он нахустин мусобиқаи интихобии олимпӣ башумор меравад. Дар ин мусобиқа 5 нафар беҳтарини ҳар категорияи вазнӣ соҳиби роҳхати олимпӣ мегарданд. Ёдовар мешавем, ки натиҷаи беҳтарини варзишгарони Тоҷикистон оид ба гӯштини юнонӣ-римӣ медали биринҷии Муродҷон Тӯйчиев дар Бозиҳои Осиё-2010 (Гуанжоуи Чин) мебошад.

Сармураббии дастаи мунтахаби ҳандболи ҷумҳурӣ Муҳаммад Мирзоҳодиев доир ба рушди ин намуди варзиш дар кишвар гузориш дод. Ба маълумоти додаи ӯ феълан дар Донишкадаи тарбияи ҷисмонии Тоҷикистон дар ихтисоси ҳандбол 11 гурӯҳ бо фарогирии 275 нафар ва дар Коллеҷи тарбияи ҷисмонии Тоҷикистон 4 гурӯҳ бо фарогирии 80 нафар амал мекунанд. Умуман, дар ҷумҳурӣ 540 нафар (352 мард, 188 зан) зери роҳнамоии 23 мураббӣ дар ин намуди варзиш тамрин мекунанд.

Сармураббии дастаи мунтахаби кишвар оид ба акробатикаи варзишӣ Рахила Алимова зимни баромадаш, қайд кард, ки акробатика дар шаҳри Душанбе ва вилояти Хатлон бештар миёни наврасону ҷавонон рушд кардааст. Дар шароити ҷумҳурии мо калонсолон ба ин намуд машғул намешаванд. Хусусан духтарон баъд аз ба шавҳар баромадан тамринро бас мекунанд.

Сармураббии тими мунтахаби бадминтони ҷумҳурӣ Алишер Абдураҳимов оид ба вазъ ва ҳолати намуди бадминтон гузориш дод. Гуфта шуд, ки Федератсияи бадминтони Тоҷикистон соли 2010 таъсис ёфта, соли 2012 аз ҷониби Федератсияи байналмилалии бадминтон эътироф гардид.

Бо дастгирии Ҳукумати Ҷумҳурии Тоҷикистон дар ин муддат дар тобеи мактабҳои варзишӣ 22 гурӯҳ ва дар тобеи муассисаҳои таълимӣ 44 гурӯҳ таъсис дода шуд, ки ба онҳо 880 варзишгар фаро гирифта шудаанд. Пешниҳод шуд, ки федератсия дар ҳамкорӣ бо Кумитаи кор бо ҷавонон ва варзиш ҷиҳати муаррифии намуди бадминтон ва ҷалби аҳолӣ ба ин намуд дар ҷумҳурӣ фестивали бадминтон гузаронад.

Дар ҷаласа масъалаҳои дигари соҳаи варзиш муҳокима шуданд


Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 1 2 3 4 5

Феврал 2023 c.