Дар меҳмонхонаи «Hyatt regency»-и пойтахт маросими расми супоридани медалҳои тиллои Чемпионати мамлакат оид ба футбол байни дастаҳои Лигаи олӣ ва Ҷоми чемпионӣ баргузор гардид. Ҳарду ин ҷоизаҳо ба КФ «Истиқлол»-и Душанбе супорида шуд.

Дар маросими ҷоизасупорӣ роҳбарони Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон, ФФТ, сарпарастон, меҳмонон ва намояндагони ВАО ширкат намуданд.

Гуфта шуд, ки тими «Истиқлол»-и Душанбе дар мавсими футбол- 2016 аз 18 вохӯрӣ 14 ғалаба карда, се бозиро мусовӣ анҷом додааст. Танҳо дар як вохӯрӣ дар муқобил ба дастаи «Равшан”-и Кулоб ба мағлубият дучор гаштааст.

Қаҳармони Тоҷикистон дар мавсими футболи 2016 ба дарвозаи ҳарифон 67 тӯб зада, 20 тӯбро аз дарвозааш гирифта, 45 холро соҳиб шудааст.

Ҳайати дуюми ҷавонони «Истиқлол» низ дар мубориза барои медалҳо аз ҳамаи дастаҳо пеш гузашта, соҳиби ҷои аввал шуд. Ҳайати дуюми ҷавонон ҳам  бо медал ва Ҷом сарфароз гардиданд.

Дар охир роҳбарияти КФ «Истиқлол» барои дастгирӣ ва саҳмгузорӣ ба сарпарастон ва намояндагони ВАО дар мавсими соли 2016 минатдории худро баён карда, ба онҳо ифтихорномаву ҷоизаҳо ҳадя намуд.

Ёдрас мешавем, ки тими «Истиқлол» дар мавсими футболи соли 2017 бо сармураббии тозаинтихобаш, Мӯҳсин Муҳаммадиев  рақобатҳоро оғоз мекунад.