Қаҳрамони кишвар оид ба футбол дастаи “Истиқлол”-и шаҳри Душанбе дар марҳилаи муқаддамотии Лигаи қаҳрамонҳои КФО (Конфедератсияи футболи Осиё)-2019 аз тими “АГМК”-и Олмалиқ, ғолиби Ҷоми Ӯзбекистон-2018, бо ҳисоби 2:4 шикаст хӯрда аз идомаи рақобатҳои гурӯҳӣ маҳрум гашт.

Ин бозӣ, рӯзи 12-уми феврал дар Варзишгоҳи марказии шаҳри Олмалиқи ҷумҳурии Ӯзбекистон доир шуд. Дастпарварони Ҳаким Фузайлов сармураббии дастаи “Истиқлол” аввалин шуда дар дақиқаи 2-юм дарвозаи рақибро рахна намуданд. Голро нимҳимоятгари даста Муҳаммадҷон Раҳимов ба ҳадаф расонд.

Вақте рӯйхати бозингарони дастаҳоро эълон карданд, дар ҳайати захиравии “Истиқлол”-и шаҳри Душанбе танҳо як ҳимоятгар вуҷуд дошт. Ин маънои онро дошт, ки қисмати ҳимоятгарон заиф аст. Пас аз ҷароҳат бардоштани ҳимоятгари даста Бахтиёр Қаландаров дар дақиқаи 19-ум ҷойи ӯро Ҷалил Кимсанов легионери ӯзбекистонӣ иваз кард. Дар дақиқаи 25-ум соҳибони майдон зарбаи кунҷиро самаранок иҷро карданд. Дилшод Ҷӯраев пас аз партофти ҳамдастааш бо зарбаи сар тӯбро вориди дарвозаи Никола Стошич кард. Дар қисми аввал ғолиб маълум нашуд, дастаҳо бо ҳисоби 1-1 ба танаффус баромаданд.

Дар дақиқаи 62-юми дидор футболбозони тоҷик боз ба пеш баромаданд. Партофти сарвони дастаи “Истиқлол” Фатҳулло Фатҳуллоевро легионери ӯзбекистонӣ Ҷалил Кимсанов бо зарбаи сар вориди дарвозаи рақиб намуд.

Лекин хурсандии дастпарварони Ҳаким Фузайлов дер давом накард. Баъд аз бист дақиқа лавҳаи варзишгоҳ ҳисоби бозиро 2-4 нишон медод. Футболбозони “Истиқлол” дар давоми 10 дақиқа аз ғалаба ба мағлубият рӯ оварда буданд. Санат Шихов (72-юм), Ҷасурбек Ҳакимов (78-ум) ва Зафар Полвонов (82-юм) голҳои дастаи “АГМК”-и Олмалиқро ба сомон расониданд. Ёдовар мешавем, ки чор голи соҳибони майдон бо зарбаи сар аз масофаҳои наздик, вориди дарвозаи Никола Стошич шуд.

Сабаб чист? Ба ин савол Ҳаким Фузайлов сармурабби дастаи “Истиқлол” дар нишасти матбуотӣ чунин посух дод:

Мутаассифона, ҷойи бозигарони захиравии мо холӣ буд. Дар бораи бозӣ гуфтаниам, ки мо боз футболи зимистонаро дидем. Ҳамакнун ба марҳилаи гурӯҳии Ҷоми КФО омодагӣ мебинем. Кори селексиониро пурзӯр кардан лозим меояд. Зарур аст, ки бозигарони навро дарёфт кунем, бе ин ба натиҷаҳои мусбат ноил шуда наметавонем.

Ин нахустин шикасти дастаи “Истиқлол”-и шаҳри Душанбе дар бозии расмӣ таҳти роҳбарии сармураббии нав Ҳаким Фузайлов буд.

Акнун, дастаи ғолиб “АГМК”-и Олмалиқ дар даври плей-оффи Лигаи қаҳрамонҳои КФО-2019 барои роҳ ёфтан ба даври гурӯҳӣ бо тими “Ал-Наср”-и Арабистони Саудӣ рақобат мекунад. Ин дидор 19-уми феврал дар Арабистони Саудӣ доир мегардад.

Бошгоҳи “Истиқлол”, ки аз идомаи муборизаҳо ба марҳилаи гурӯҳии Лигаи қаҳрамонҳои КФО-2019 маҳрум шуд. Бозиҳояшро дар Ҷоми КФО-2019 идома медиҳад.

Маврид ба зикр аст, ки пеш аз ин бозӣ бошгоҳҳои футболи Тоҷикистон ва Ӯзбекистон расман дар мусобиқаи осиёӣ 18 сол пеш вохӯрда буданд. Соли 2001 дар доираи Ҷоми ҷомдорони Осиё дастаи “Регар-ТадАЗ”-и шаҳри Турсунзода аз рӯи натиҷаи ду бозӣ тими “Пахтакор”-и шаҳри Тошкандро (2:2, 3:1) шикаст дода буд.