Хайрандеш Муродзода, гӯштингири тоҷик дар Бозиҳои осиёӣ аз гӯштини кураш ба гирифтани нишони биринҷӣ даст ёфт.

Дар ин хусус АМИТ “Ховар” иттилоъ медиҳад.

Ин варзишгари тоҷик дар вазни то 66 кг дар даври аввал бар Ҷое Ҳеддад, ки Лубнонро намояндагӣ мекард, пирӯз гардида, дар даври чаҳорякниҳоӣ бар паҳлавони муғул Энхболд Энхтайван ғолиб омад. Дар даври ниманиҳоӣ аз паҳлавони эронӣ Маҷид Воҳид Бариманлу шикаст хурда, медали биринҷии ин мусобиқаро ба даст овард.

Бояд гуфт, ки ин нишони дуюми биринҷӣ ва медали чаҳоруми варзишгарони тоҷик аз Бозиҳои осиёии Ҳангжоу мебошад.

Ёдовар мешавем, пештар медалҳои дигарро, дар риштаи ҷудо Сомон Маҳмадбеков (-81 кг) нишони тилло, Темур Раҳимов (+100 кг) нишони нуқра ва Беҳрӯз Хоҷазода (-73 кг) нишони биринҷии мусобиқаи мазкурро ба хазинаи варзишии кишвар ворид намуданд.

Г. КАРИМОВА, “ҶТ”