Дар ноҳияи Ховалинги вилояти Хатлон бахшида ба 20-умин солгарди Рӯзи Ваҳдати миллӣ ва “Соли ҷавонон” мусобиқаҳои гуногуни варзишӣ, аз қабили шашка, шоҳмот, футбол ва волейбол миёни ҷавонону наврасон баргузор гашта истодааст.

Ба иттилои мудири бахши кор бо ҷавонон ва варзиши ноҳия Дилшод Шеров, мусобиқаи шашкаву шоҳмот, ки яке аз намудҳои маъмули варзиш дар ноҳияи Ховалинг ба ҳисоб меравад, шумораи зиёди ихлосмандони ин намудҳои варзишро ба ҳам овард. Ҳамчунин мусобиқаҳо аз намуди футболу волейбол ва намудҳои гуногуни гӯштин низ миёни варзишгарони синну солу гуногун роҳандозӣ гардидааст.

Манбаъ афзуд, ки барои дарёфти “Ҷоми Ваҳдати миллӣ” дар варзишгоҳи марказии ноҳия мусобиқаи футбол байни дастаҳои идораву ташкилот ва маҳаллаҳо ба анҷом расид. Ғолибон ва беҳтаринҳо дар чорабинии асосии Рӯзи Ваҳдати миллӣ, ки дар маркази ноҳия баргузор мегардад, бо медалу диплом ва туҳфаҳои таъсиснамудаи мақомоти иҷроияи маҳаллии ҳокимияти давлатӣ ва Бахши кор бо ҷавонон ва варзиши ноҳия сарфароз гардонида мешаванд.

Ёдрас мешавем, ки чунин мусобиқаҳои варзишӣ дар панҷ ҷамоати деҳоти ноҳияи Ховалинг баргузор гардида, дар онҳо наврасону ҷавонон ва калонсолон ширкат меварзанд.

Умед Мирзоев, “ҶТ”