Шоми дирӯз, 28 июн, бо иштироки 41 ҳазор мухлис дар Варзишгоҳи “Казан Арена”-и шаҳри Қазони Русия, бозии нахустини даври ниманиҳоии Ҷоми Конфедератсияҳо -2017 миёни тимҳои мунтахаби футболи Чили ва Португалия баргузор гардид.

Дар ин дидор тими мунтахаби Чили дар силсилаи зарбаҳои 11-метра ҳарифашро бо ҳисоби 3-0 шикаст дод.

Дар ибтидои қисми аввали рақобат барои футболбозони ҳарду даста имкониятҳои хуби голзанӣ муҳайё гардид, аммо дарвозабонҳо бо як маҳорати олӣ ҳунарнамоӣ намуда, хатарҳои бавуҷудомадаро бартараф намуданд.

Ҳарчанд то охири қисми дуюми бозӣ, имкониятҳои голзанӣ барои футболбозони ҳарду мунтахаб борҳо пайдо гардида бошад ҳам, аммо вақти асосии дидор бидуни гол ба охир расид ва дар 30 дақиқаи илова намудаи довар низ дастаҳо ба задани гол даст наёфтанд.

Барои ғолибро муайян намудан довари эронӣ Алирезой Фагани силсилазарбаҳои 11 метра таъин намуд.

Дар задани силсилазарбаҳои 11-метра нақши дарвозабони тими миллии Чили Клавдио Браво басо калон буд. Зеро ӯ се маротиба пай дар ҳам зарбаҳои бозигарони мунтахаби Португалияро баргардонда, тими мунтахабашро ба финали Ҷоми Конфедератсияҳо баровард.

Ёдовар мешавем, ки шоми имрӯз мунтахаби миллии Олмон дар бозии дуюми даври ниманиҳоии Ҷоми Конфедератсияҳо дар варзишгоҳи “Фишт”-и шаҳри Сочии Русия дастаи якачини тими миллии Мексикаро қабул менамояд.

Ин дидор соати 23:00 ба вақти маҳаллӣ оғоз мегардад.

Шаҳбози АСОМИДДИН, “ҶТ”