Боиси хушнудист, ки имрӯзҳо бо дастгирии бевоситаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, Президенти Кумитаи миллии олимпии кишвар муҳтарам Эмомалӣ Раҳмон варзишгарони тоҷик рӯз аз рӯз дар мусобиқаҳои байналмилалӣ фаъолона ширкат намуда, Парчами давлати азизамонро парафшон намуда истодаанд.

Комроншоҳи Устопириён, яке аз варзишгарони номдори тоҷик, ки дар партави сулҳу суботи даврони соҳибистиқлолии Ватан ба воя расидааст, маҳз бо дастгириҳои Пешвои миллат натиҷаҳои баланди варзиширо ноил ва варзиши миллати тоҷикро ҳам дар дохил ва ҳам хориҷи кишвар муаррифӣ намуда истодааст, исботи гуфтаҳои болост.

Комроншоҳ дар мусобиқаи байналмилалии Гран-Прии ҷудо (“Grand-Prix Antalya - 2018”), ки дар шаҳри Анталияи Туркия 6 - 8 апрел баргузор гардид, дар вазни 90 кило соҳиби медали тилло шуд. Пас аз он дар мусобиқаи VII байналмилалӣ оид ба гӯштини кураш барои ҷоизаҳои Президенти Ӯзбекистон ба номи Амир Темур, ки рӯзҳои 21 - 22 апрел дар Шаҳрисабз ҷараён гирифт, ғолиб шуда, номи Тоҷикистонро бори дигар ба оламиён муаррифӣ намуд.

Дар ин замина, ҳайати эҷодии рӯзномаи “ҶТ” перомуни фаъолияти касбӣ ва варзишии Комроншоҳи Устопириён тасмим гирифт, ки бо эшон сӯҳбат орояд ва фишурдаи онро ба хонанда пешкаш менамоем.

- Комроншоҳ Шуморо аз номи ҳайати эҷодии рӯзномаи “ҶТ” бо пирӯзии навбатиатон шодбош мегӯем ва барои хонандаи рӯзнома оид ба пирӯзиатон нақл мекардед.

- Ташаккур, бениҳоят шод ҳастам, пеш аз ҳама мехоҳам ба хонандагони рӯзнома ва мухлисонам расонам, ки ғолибият ва пирӯзии ман дар мусобиқаҳои ҷаҳонӣ ва ҳамаи дастовардҳоям дар риштаи муаррифии варзиши тоҷик бевосита аз дастгириву ѓамхорињои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аст, ки шароити мусоидро барои мо варзишгарони тоҷик муҳайё сохтаанд. Маҳз эътимоду боварии Пешвои миллат аст, ки мо бо тамоми нерӯ барои баланд бардоштани Парчами кишвари азизамон дар хориҷи кишвар сабқат менамоем ва ҳамаи талошҳои мо варзишгарон танҳо ба хотири муаррифии миллати тоҷик аст ва посух ба дастгириву ғамхориҳои Ҳукумати кишвар равона мешавад.

Бовар мекунед, зимни сабқат дар саҳнаи мусобиқаҳои варзишӣ танҳо ғурури миллӣ ва боварии Пешвои миллат бароямон такягоҳ аст.

- Барои иштирок дар мусобиқаи байналмилалии Гран-Прии ҷудо (“Grand-Prix Antalya - 2018”)- шаҳри Анталияи омомдагиҳо дар кадом сатҳ буд?

- Масъалаи тамрин ва омодагии ҷиддии ман дар мусобиқаи Гран-Прии ҷудо (“Grand-Prix Antalya - 2018”)- шаҳри Анталия ва умуман дар тамоми мусобиқаҳое, ки ман ширкат меварзам доимо зери таваҷҷуҳи масъулини соҳа, хусусан идораҳои соҳавӣ Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Кумитаи миллии олимпии Тоҷикистон ва роҳбарияти мақомоти иҷроияи ҳокимияти вилояти Суғд қарор мегиранд.

Бароям тамоми имконоту шароитҳои тамрин фароҳам оварда шудааст, ки аз ин хотир вазифаи дар пешгузоштаи ман ин танҳо бо тамоми нангу номуси тоҷикона ва бо ҷиддияти тому софдилона ба тамрин машғул шудан аст.

Зимни тамрин мураббиёнам имкони озоди пешниҳоди дархостро ба роҳбарияти идораҳои соҳавии варзишӣ вобаста ба ҳалли мушкилотҳои ҷойдошта ва ё маслиҳатҳои муфид доранд, ки дар ин асос тамоми масъалаҳои ба миён омада саривақт бартараф ва мусоидат карда мешаванд, ки натиҷаи ин омил самараи натиҷаи дастовардҳои ман мебошад.

Барои омода шуданам ба мусобиқаи мазкур саҳми мураббиёнам Воҳид Сарлак ва Фариддун Устопиров хеле калон аст. Маро дар машқҳои дастаҷамъӣ ҳамаҷониба омода намуда, аз ҷиҳати техникӣ-психологӣ низ хуб тайёр карданд.

Танҳо ҳаминро қайд карданӣ ҳастам, ки муддате чанд аст, ки бо сабабҳои мухталиф атрофи масъалаи дастгирӣ ва мусоидати машқу тамрини ман ва умуман ҳамкории ман бо идораҳои соҳавӣ баҳсҳои зиёдеро дар ҷомеа ба вуҷуд овардааст ва бархе аз ҳангомасозон бо бофтаҳои хаёлӣ мехоҳанд, фазои мусоиди фаъолияти маро бо идораҳои соҳавӣ халалдор созанд.

Бовар дорам, ки пас аз мусоҳибаи мо тамоми алангаи бофтахаёлии ҳангомасозони ҷомеаи мо пахш карда мешаванд.

Зеро ҳадафи ман парафшон намудани Парчами давлатӣ ва ба ифтихори ғолибиятам садо додани Суруди миллии Ҷумҳурии Тоҷикистон мебошад. Амаликунандагони ҳадафҳоям бошанд, дастгириҳои беназири Пешвои миллат ва таваҷҷуҳи мақомоти салоҳиятдори давлатӣ дар соҳаи татбиқи сиёсати варзиш дар Ҷумҳурии Тоҷикистон мебошанд.

-Комроншоҳ дар атрофи дастгириҳо бисёр ёдовар гардидед, маълум аст, ки натиҷаҳои Шумо аз дастгириҳои пайвастаи давлат ва Ҳукумати Ҷумҳурии Тоҷикистон аст, барои хонанда камтар равшантар менамудед?

-Бале, бо ифтихор пайваста оид ба дастгириҳои Пешвои миллат муҳтарам Эмомалӣ Раҳмон дар тамоми вазъ ёдовар мешавам.

Маҳз дар заминаи ғамхориҳои пайвастаи Сарвари давлат ва ҷорӣ намудани ҳавасмандӣ барои варзишгарон дар соли 2017 ман сазовори номи баланди Ҷоизадори Президентӣ ва ба миқдори 75 ҳазор сомонӣ қадрдонӣ гардидам.

Инчунин бо стипендияи Кумитаи миллии олимпӣ, ки ҳар моҳ дар ҳаҷми 700 доллари ШМА муқаррар гардидааст ва ҳамзамон бо стипендияи Кумитаи кор бо ҷавонон ва варзиш дар ҳаҷми 400 сомонӣ шарафёб мегардам.

Маҳз ҳамин дастгириҳо буд, ки тавонистам дар машқҳои дастаҷамъӣ фаъолона иштирок намоям. Ин ғамхориҳои Ҳукумати кишварро ҳамчун фарзанди ин миллат ҳеҷ гоҳ фаромӯш намесозам.

- Аз нигоҳи шумо ҳамчун варзишгари касбӣ фарқи Гран-Прии Анталия-2017 аз Гран-Прии Анталия-2018 дар чӣ буд?

- Гӯштини ҷудо бисёр нозук аст. Як иштибоҳ сабаби мағлубият мегардад. Дар Гран-Прии Анталия-2017 соҳиби медали нуқра гардида будам ва ҳадафи ягонаи ман ғолиби ин мусобиқа гардиданд буд.

Новобаста аз он ки назар ба соли қаблӣ бо ҳарифҳои қавӣ рӯ ба рӯ шудам, аммо тамоми саъю талошам ва нерӯамро барои ғалаба сарф намудам ва шукр, ки дар охир ба мақсадам расидам.

Дар умум гирем, ҳеҷ фарқияте дида намешавад. Яъне, мусобиқа ҳамон мусобиқа аст. Танҳо рақибон иваз шуданд. Аммо дар мусобиқаи охир ҳарифон қавитар буд. Шароити мусоид ва дастгирии хуби Роҳбарияти давлат ва сохторҳои марбута сабаб шуданду ман тамринамро аз пештара хубтар намудам ва самараи ин дастгириҳо буд, ки ба ҳадафам расидам.

-Лаҳзаҳои хотирмонро барои хонандаи рӯзнома нақл мекардед?

Аз ҳама лаҳзаи хотирмон ва дучандкунандаи ифтихор, ин интизориҳо ва пешвози мухлисонам, волидайни азизам ва масъулини соҳаи кор бо ҷавонон ва варзиш аст, ки ба ман бовар карданд ва ман ба боварии онҳо сазовор гардида бо сари баланд ба ошёни меҳр- Ватан баргаштам.

Зимни бозгашт аз мусобиқаи Анталия маро дар фурудгоҳ кормандони Кумитаи кор бо ҷавонон ва варзиш устод Бозор Носир, сармураббии тими миллии ҷудои ҷумҳурӣ Муҳаммад Абдураҳмонов, намояндагони ВАО-и кишвар, аҳли оилам ва дигар мутасаддиёни варзиши мамлакат бо самимияти хоса ва бародарвор пешвоз гирифта табрик намуданд.

Ва дар рӯзи дигар маро раиси Кумитаи кор бо ҷавонон ва варзиш, муовини Президенти Кумитаи миллии олимпии Тоҷикистон Аҳтам Абдуллозода дар бинои Кумитаи миллии олимпӣ қабул намуданд, бо пирӯзиам муборакбод намуда атрофи машқу тамрин, омодагии ман ба бозиҳои Ҷакарта, имкони иштирок дар мусобиқаи VII байналмилалӣ оид ба гӯштини кураш барои ҷоизаҳои Президенти Ӯзбекистон ба номи Амир Темур, ки рӯзҳои 21 - 22 апрел дар Шаҳрисабз ҷараён гирифт ва ман бо дастгирии идораҳои соҳавӣ ғолиб гардидам ва оид ба масъалаи стипендияву фармокология суҳбати хубу хотирмонро анҷом дода бо 5 ҳазор сомонӣ қадрдонӣ намуданд.

Рости ҳамон эҳсосе, ки дар ман буд, онро иброз доштан номумкин аст, онро танҳо эҳсос карда мешавад. Бо миллату Ватанам ифтихор дорам. Ва аз ҳар як тоҷику тоҷикистонӣ миннатдор ҳастам, бо онҳо ифтихор дорам.

Ин лаҳзаҳо бароям гувороанд.

- Пас аз мусобиқаи Гран-Прии Анталия дар феҳристи ҷудочиёни дунё аз мавқеи 7 ба 4 баромадед. Аз фаъолияти худ қаноатмандед?

- Ғамхориҳои Пешвои миллат нисбати мо - варзишгарон бениҳоят зиёд аст. Ин ғамхориҳо зимни иштирок дар мусобиқаҳои варзишӣ нерӯву қувваи ҷисмонии моро дучанд ва ҳар яки мо – варзишгарони ҷавонро барои саҳм гузоштан дар рушди соҳаи варзиши Тоҷикистони соҳибистиқлол ҳидоят менамоянд. Маҳз, заҳмату талошҳои беназири Пешвои миллат муҳтарам Эмомалӣ Раҳмон буд, ки имрӯз мо - варзишгарони ҷавон дар фазои сулҳу субот ба натиҷаҳои баланди варзишӣ ноил гардидем. Пас аз ҷароҳат бардоштанам дар чанд мусобиқаҳои байналмилалӣ иштирок карда натавонистам ва дар раддабандии федератсияи байналмилалии ҷудо аз мавқеи 3 ба 7 фаромадам. Хушбахтона, пас аз пирӯзи дар Гран-Прии Анталия-2018, соҳиби 700 хол гардида, мавқеамро дар радабандӣ ба ҷои 4 баровардам. Бешак ин дастоварди хуб аст, аммо то ҳол аз ин қаноатманд нестам. Нақша дорам, то бозиҳои олимпӣ – 2020 шомили феҳристи панҷгонаи ҷудочиёни ҷаҳон шавам ва бароям дар қуръакашии бозиҳои олимпӣ имконияти хуб фароҳам меояд.

- Нақши варзишгарро дар муаррифии миллат чӣ гуна арзёбӣ мекунед?

- Ҳар як варзишгари тоҷикро, ки дар дилхоҳ намуди варзиш машғул аст, агар ҳадафаш муаррифии миллат бошад, эҳтиром мекунам. Ягона чизе, ки варзишгарро дар мусобиқаҳои байналмилалӣ қувват мебахшад, ин ҳису ғурури миллӣ аст. Ва ин ҳис аз варзишгар тақозо мекунад, ки нерӯи худро танҳо ба хотири обрӯи миллат сарф созад.

Бовар дорам, ки ҳар яки моро дар лаҳзаҳои садо додани Суруди миллӣ, афрохта шудани Парчами давлатӣ дар арсаи байналмилалӣ эҳсос ва нангу номуси ватандорию ватандӯстӣ фаро мегирад. “Варзиш муаррифгарӣ миллат аст”-мегӯянд ва дарин гуфта ягон тардид нест. Шукронаи оромӣ ва сулҳу осоиштагии кишвар, ки дар солҳои соҳибистиқлолӣ бо дастгирию ташаббус ва таваҷҷуҳи Пешвои муаззами миллат ба соҳаи варзиши мамлакат вусъати тоза ба худ касб намуд ва ба тадриҷ рушду нумӯ кард ва Тоҷикистони азизро дар арсаи ҷаҳон ба таври назаррас муаррифӣ намуд.

- Ҳоло ба кадом мусобиқа тайёрӣ дида истодаед ва чӣ ниятҳо доред?

- Ҳоло барои мусобиқаи Гран-Прии ҷудо, ки дар шаҳри Хух-Хотои давлати Чин баргузор мегардад, омодагӣ дида истодаам. Талош дорам, ки дар чемпионати ҷаҳон, ки моҳи сентябр дар Бокуи Озарбойҷон баргузор мешавад, соҳиби ҷоиза гардам. Ҳамчунин, ният дорам дар мусобиқаи Бозиҳои осиёӣ, ки моҳи август дар Ҷакартаи Индонезия барпо мегардад, Парчами давлатамонро баланд бардорам.

Дар заминаи таваҷҷуҳу дастгириҳои доимии Пешвои миллат ва ҳамватанони азизам тамоми мардуми кишварро бовар мекунонам, ки минбаъд низ дар мусобиқоти байналмилалӣ иштирок ва обрӯи миллатамонро боз ҳам баландтар мебардорам. Мекӯшам, ки сазовори сиёсати ҷавонпарваронаи Пешвои миллат бошам.

Таманнои Шумо барои хонандаи рӯзнома ва кулли сокинону мухлисони кишвар?

Орзуи онро мекунам, ки ҳамеша содиқ ба миллату Ватан бошанд. Мо бояд якҷоя барои пойдории сулҳу субот ва оромиву нишот дар ҷомеа бо истифода аз мактаби бузурги ватандӯстиву ватанпарастии Пешвои миллат, муҳтарам Эмомалӣ Раҳмон заҳмат бикашем то, ки Тоҷикистони биҳиштосои мо ҳамеша ободу сарсабз бошад ва мо варзишгарон танҳо ба хотири парафшонии Парчами он талош варзем.

Инчунин тамоми он нафароне, ки ҳангомаро дӯст медоранд, бори дигар қайд менамоям, ки хубтараш барои беҳбудии фаъолияти ҷомеа бикушанд ва самараи некро барои ободии ҷомеа гузоранд.