Тибқи тақвими Федератсияи футболи Тоҷикистон ду бозии даври 15-уми Лигаи олӣ миёни дастаҳои “Хуҷанд”-и шаҳри Хуҷанд ва “Панҷшер”-и ноҳияи Ҷалолиддини Балхӣ, “Ҳосилот”-и ноҳияи Фархор ва ССКА “Помир”-и шаҳри Душанбе рӯзи 5-уми август баргузор гардид.

Дар ҳарду бозӣ дастаҳои садрнишинӣ мусобиқа “Хуҷанд”-и шаҳри Хуҷанд ва ССКА “Помир”-и шаҳри Душанбе комёб гардиданд.

Дастаи “Хуҷанд”-и шаҳри Хуҷанд дар Варзишгоҳи “20-солагии Истиқлолияти Тоҷикистон” тими “Панҷшер”-и ноҳияи Ҷ. Балхиро қабул намуда, бозиро бо ҳисоби 2:1 ба нафъи дастааш анҷом дод. Нахустин голи дидорро дар дақиқаи 20-ум ҳамлагари мизбонон Давронҷон Тухтасунов ба сомон расонд ва дастаҳо бо чунин ҳисоб ба танаффус баромаданд. Дар қисми дуюми рақобат 2500 мухлис шоҳиди ду голи дигар гардиданд. Дар дақиқаи 51-ум Давронҷон Тухтасунов голи дуюми дастаашро вориди дарвозаи Сафар Наботов намуда, дубл намуд. Дар дақиқаи 86-уми дидор ба ҳамлагари меҳмонон Шавкати Ҳотам муяссар гардид, ки ҳисобро тағйир диҳад ва бозӣ бо натиҷаи 2-1 ба итмом расид.

Дар бозии дигари ин давр дастаи ССКА “Помир”-и шаҳри Душанбе меҳмони тими “Ҳосилот”-и Фархор гардида, бозиро бо ҳисоби калон 4:0 хотима бахшид. Голҳоро Абдухалил Боронов (19), Расул Файзов (66), Зоир Ҷӯрабоев (75) ва Хазу Ото (81) ба ҳадаф расонданд.

Ёдовар мешавем, ду бозии аввали даври 15-ум рӯзи 3-юми август баргузор гардида буд. Тими “Истиқлол”-и шаҳри Душанбе дар Варзишгоҳи марказии шаҳри Ҳисор дастаи “Вахш”-и шаҳри Қӯрғонтеппаро қабул намуда, бо ҳисоби 1:0 пирӯз гардид. Голи ягонаи дидорро дар дақиқаи 52-юм легионери русиягӣ Дмитри Барков ба сомон расонд.

Бозии дигари ин давр дар Варзишгоҳи “Талко-Арена”-и шаҳри Турсунзода миёни тимҳои “Регар-ТадАЗ”-и Турсунзода ва “Барқчӣ”-и Ҳисор баргузор гардид. Дар ин дидор соҳибони майдон бо ҳисоби 1:0 дастболо гардиданд. Голро дар дақиқаи 28-ум пас аз партофити кунҷӣ, нимҳимоятгари меҳмонон Саидмухтор Азимов ба дарвозаи дастааш зад.

Дар ҳоли ҳозир дастаи “Истиқлол”-и шаҳри Душанбе, ки дар 14 бозӣ 36 хол ба даст овардааст, садринишини ҷадвали мусобиқа мебошад. Дар ҷойи дуюм дастаи “Хуҷанд”-и шаҳри Хуҷанд бо 27 имтиёз ва дар зинаи сеюм тими ССКА “Помир”-и шаҳри Душанбе бо 25 хол ҷойгир шудаанд.

Ду бозии даври 16-уми мусобиқаи қаҳрамонии Тоҷикистон оид ба футбол миёни дастаҳои лигаи олӣ рӯзи 12-уми август баргузор мегардад. Дар ин рӯз дастаи “Вахш”-и Қӯрғонтеппа дар майдони худ бо тими “Панҷшер” ва ССКА “Помир”-и шаҳри Душанбе бо дастаи “Хуҷанд”-и Хуҷанд рақобат мекунанд. Бозии марказии ин давр рӯзи 14-уми август миёни дастаҳои “Истиқлол” ва “Регар-ТадАЗ” дар Варзишгоҳи марказии Ҳисор барпо мегардад.
Мавқеи дастаҳо дар ҷадвали мусобиқа

Ҷ ДАСТАҲО                                      Б  Ғ  М  Б  Т/т    И
1 “Истиқлол” (Душанбе)                  14 11 3  0  43-7   36
2 “Хуҷанд” (Хуҷанд)                         15 8   3  4  30-13 27
3 ССКА “Помир” (Душанбе)            15 6   7  2  14-8   25
4 “Регар-ТадАЗ” (Турсунзода)         15 4   5  6  10-15 17
5 “Барқчӣ” (Ҳисор)                            14 4  4  6   9-16  16
6 “Ҳосилот” (Фархор)                        15 4  3  8  13-33 15
7 “Панҷшер” (Ҷалолиддини Балхӣ) 15 4  2  9  18-30 14
8 “Вахш” (Қӯрғонтеппа)                     15 2  5  8  9-24   11

Нишонзанҳо: Манучеҳр Ҷалилов (“Истиқлол”) – 13 тӯб, Дилшод Бозоров (“Хуҷанд”) – 8 тӯб, Фарҳод Тоҳиров, Давронҷон Тухтасунов (ҳарду “Хуҷанд”) – 7 тӯб.

Даври 16-ум
12 август (шанбе)
Оғози бозиҳо – соати 17:30
“Вахш” – “Панҷшер”
Қӯрғонтеппа, варзишгоҳи “Пахтакор”
ССКА “Помир” – “Хуҷанд”
Душанбе, варзишгоҳи КМВА-и Вазорати мудофиаи ҶТ
14 август (душанбе)
Оғози бозӣ - соати 20:00
“Истиқлол” – “Регар-ТадАЗ”
Ҳисор, Варзишгоҳи марказӣ

Шаҳбози АСОМИДДИН, “ҶТ”