ВАРЗИШ
Якшанбе 24 Январ 2021 01:36
7615
Имрӯз дар кишвар баробари мактабҳои варзишӣ, ҳамчунин мактаби ҷумҳуриявии маҳорати олӣ оид ба варзишҳои сабук фаъолият дорад, ки дар тайёр намудани варзишгарони бомаҳорат ва ба арсаи байналмилалӣ баровардани эшон мураббиёни ин муассиса пайваста ҷидду ҷаҳд доранд. Оид ба фаъолияти муассисаи мазкур, мудири қисми таълимии он Надима Мирзоева чунин гуфт:

- Мактаби олии Тоҷикистон оид ба варзишҳои сабук соли 2006 ба фаъолият шуруъ намудааст. Ҳоло дар ин ҷо 5 нафар мураббии шоиста ва 4 нафар мураббии дараҷаи байналмилалӣ ба тарбияи шогирдон, яъне варзишгарони оянда машғуланд. Бозиҳои нақшавии мо дар сатҳи байналмилалӣ аз сабаби бемории коронавирус баргузор нашуд. Лек дар мусобиқаҳои дохили ҷумҳуриявӣ ба натиҷаҳои хуб ноил шудем. Соли пешин бошад, варзишгарони мо дар 12 мусобиқаи байналмилалӣ ширкат варзида, соҳиби 69 медал аз ҷумла 21 тилло 15 нуқра ва 21 биринҷӣ шуданд. Имсол боз тавонистем 3 чеҳраи навро аз мактабҳои варзишии гуногуни мамлакат шомили дастаи мунтахаб намоем.

Зикр намудан бамаврид аст, ки ҷалб ба ин намуди варзиш ихтиёрӣ буда, наврасону ҷавонони шавқманд дар ин мактаб тариқи ройгон маҳорати хешро сайқал медиҳанд. Зеро маблағгузорӣ пурра аз ҷониби Ҳукумати кишвар ба роҳ монда шудааст. Айни замон бештар ҷавонон ба тамрин фаро гирифта шудаанд. Аз сабаби сардии фасли сол кӯдакону наврасонро волидон барои машқ намудан иҷозат намедиҳанд. Зеро айни замон дар мактаб тамрингоҳи зимистона мавҷуд нест. Аз ин сабаб ҳоло ҷалби хоҳишмандон каме коҳиш ёфтааст. “Умед дорем, ки ин мушкилӣ бартараф шуда, мо соҳиби тамрингоҳҳои мутобиқ ба фаслҳои сол гардем ва наврасону ҷавонони зиёдро ҷалб намуда, ба мақсади асосии худ, яъне роҳхат ёфтан ба бозиҳои олимпӣ бирасем” – изҳор дошт Надима Мирзоева.

Сармураббии мунтахаби Тоҷикистон оид ба варзиши сабук Ғайрат Негматов мегӯяд, айни замон тайёриҳоро хуб ба роҳ мондаем. Зеро имсол аз сабаби бемории фарогир ягон мусобиқаи байналмилалӣ доир нагардид. Тавре ӯ гуфт:

- Дар тақвими соли оянда мусобиқаҳои нақшавии дусола ба роҳ монда шудааст, яъне солҳои 2020 ва 2021. Ба ин нақша олимпиада, мусобиқаҳои қитъавӣ, Чемпионати Осиё байни наврасон ва мусобиқаҳои ниммарафонӣ ворид шудааст. Мо умед дорем, ки агар ин мусобиқаҳо баргузор шаванд иштирок намуда, соҳиби ҷоизаҳо гардем. Чунки ширкат наварзидан дар мусобиқаҳои байналмилалӣ малакаи варзишгарону мураббиёнро коста мегардонад. Ба мусобиқаҳои байналмилалӣ 8 нафар варзишгари калидиро ҷудо ва омода кардаем. Соли равон дар як мусобиқаи онлайнии байналмилалӣ иштирок намудем. Дар ин мусобиқа варзишгари навраси мо Амина Амирова дар давидан ба масофаи 500 метр иштирок намуда, миёни варзишгарони 26 даста соҳиби ҷойи саввум гардид.

Аз суҳбат бо мутахассисон ва варзишгарони ҷавон аён шуд, ки эшон танҳо як мақсад доранд: роҳ ёфтан ба мусобиқаҳои байналмилалӣ. Умед аст, онҳо ниятҳои неки хешро амалӣ сохта, дар пешрафти варзиши сабуки кишвар саҳм мегузоранд.

Исфандиёр АМАКҶОНОВ,
коромӯзи “ҶТ”

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
28 29 30 31 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Январ 2021 c.