17 октябр дар Куала-Лумпур – пойтахти Малайзия ҷаласаи Кумитаи иҷроияи Конфедератсияи футболи Осиё, баргузор шуд. Дар ин ҷаласа Қатар мизбони марҳилаи финалии Ҷоми Осиё-2023 интихоб гардид.

Ҷоми Осиё-2023 бояд дар Чин баргузор мешуд. Аммо бо сабаби пандемияи коронавирус Конфедератсияи футболи Осиё Чинро аз ҳаққи мизбонӣ маҳрум кард.

Дар Ҷоми Осиё-2023 24 даста иштирок мекунанд. Ба ҷуз аз тими миллии Тоҷикистон, дастаҳои Ҷопон, Сурия, Қатар, Кореяи Ҷанубӣ, Австралия, Эрон, Арабистони Саудӣ, АМА, Чин, Ироқ, Уммон, Ветнам, Лубнон, Урдун, Фаластин, Узбекистон, Тайланд, Ҳиндустон, Ҳонконг, Баҳрайн, Малайзия, Қирғизистон ва Индонезия дар мусобиқа ширкат меварзанд.

Аз рӯи натиҷаи қуръакашӣ 24 даста ба шаш гурӯҳ тақсим мешаванд. Пас аз анҷоми марҳилаи гурӯҳӣ ду тими беҳтарин аз ҳар гурӯҳ ва чор дастаи ҷои сеюми гурӯҳҳо, ки нишондиҳандаи беҳтар доранд, ба даври 1/8-ниҳоӣ роҳ меёбанд.

Дар ҳамин ҳол, Ҳиндустон ва Арабистони Саудӣ ба ҳайси ду довталаби мизбонии Ҷоми Осиё-2027 шомил шуданд ва қарори ниҳоӣ бояд дар Конгресси AFC, ки моҳи феврали соли 2023 ба нақша гирифта шудааст, қабул гардад.

Бояд қайд кард Қатар, ки чемпиони феълии Осиё мебошад, бори сеюм дар таърихи худ мизбони Ҷоми Осиё мешавад. Қаблан солҳои 1988 ва 2011 Чемпионати Осиё дар ин кишвар баргузор шуда буд. Ҳамчунин моҳҳои ноябр-декабри имсол дар Қатар Чемпионати ҷаҳонии футбол доир мешавад.