Чанде пеш дар шаҳри Шарлотаи иёлоти Каролинаи Амрико мусобиқаи бокси ҳирфавӣ дар вазни 76 килло баргузор гардид. Дар ин рақобат муштзани 21-солаи тоҷик Меҳрубон Сангинов бар ҳарифаш Стефен Дерстайн аз ИМА ғолиб омада, унвони қаҳрамони ҷаҳонро аз рӯи намуди WBB (“World Boxing Board”)-ро ба даст овард, ки натиҷаи ба дастовардаи Меҳрубон Сангинов дар таърихи бокси кишвар аввалин маҳсуб меёбад.

Дар ҳошияи ин ғолибият бо Меҳрубон Сангинов оид ба фаъолияти варзишӣ ва нақшаҳои ояндааш суҳбат намудем, ки фишурдааш пешкаш мегардад.

- Нахуст Шуморо барои ғолибиятатон бори дигар табрик мегӯем. Лутфан, мегуфтед, ки фаъолияти варзишиатон аз куҷо сарчашма мегирад?

- Аз овони кӯдакӣ дар дил орзуи варзишгар шуданро доштам. Шавқу ҳаваси маро падарам дарк намуда, дар синни 7-солагӣ ба Варзишгоҳи марказӣ бурда, ба дастаи футболи “Душанбе-1” супориданд. Дар ин риштаи варзиш то 12-солагӣ ҳунарнамоӣ намуда, дар тими мунтахаби наврасони кишвар бозӣ мекардам. Соли 2008 бо тавсияи дӯстам Сиёвуш Зуҳуров аз майдони футбол ба майдони набард, яъне бокс қадам ниҳода, тамринҳои аввалини худро дар назди Парвиз Ахмедов, Мураббии шоистаи Тоҷикистон оид ба бокс, Устоди варзиши СССР оғоз намудам.

- Дар баробари тавсияи дӯстатон чӣ шуморо аз футбол ба бокс овард?

- Футбол бозиест, ки барои ғолиб омадан тамоми даста талош меварзанд ва дар бокс бошад, шахс тамоми зинаҳоро бояд худаш гузарад. Аз ин лиҳоз, тасмим гирифтам, ҳайёти варзишии ояндаамро бо бокс гузаронам ва парчамбардори кишвари азизи хеш бошам.

- Дар риштаи интихобнамудаатон киро идеал меҳисобед?

- Дар айёми хурдсолӣ филми ҳунарии “Рокки”-ро бештар тамошо мекардам. Қаҳрамони ин филм иродаи қавӣ дошту барои ғолибият ҷаҳду талоши беандоза мекард ва ин ҳунарманд идеали ман буд. Баъди шиносоӣ пайдо кардан ба нозукиҳои бокс муштзани маъруф Муҳаммад Алиро идеал интихоб намудам. Ҳамин сабаб шуду бокси ҳирфавиро пеша намудам.

- Кадом пирӯзӣ дар кариераи вазишиятон хотирмонтарин аст?

- То ин муддат бисёр ҷоизаҳо ба даст овардаам. Инчунин, дар бокси олимпӣ низ ширкат намуда, ҷоизадори бозиҳои Осиё мебошам, ки ин ҳама бароям хотироти нек мебошад. Аммо яке аз хотираҳои беҳтаринам дар соли 2017 ин мусобиқаи “Boxing Show II” мебошад, ки дар шаҳри Варшаваи давлати Полша баргузор гардида буд. Дар ин набард бисёр заҳмат кашидам ва дар охир ситораи давлати Полша Одам Грабитсемро шикаст додам, ки ин яке аз хотираҳои фаромӯшнашаванда дар кариераи варзишиям мебошад.

- Аз нигоҳи Шумо имрӯз бокси тоҷик дар кадом сатҳ қарор дорад?

- Дар кишварамон ин намуди варзиш оҳиста–оҳиста рӯ ба пешравӣ мениҳад. Барои варзишгарон толорҳои замонавӣ ва шароити хуби тамрин муҳайё гардидааст. Барои ба даст овардани ҷоизаҳои байналмилалӣ аз варзишгарони мо танҳо талош мебояд. Баъзеҳо бар он назаранд, ки дар кишварамон боксиёри касбӣ шудан душвор аст. Ман ба ин фикрҳо муқобилам, зеро дар тамоми дунё тамринҳо як аст. Масалан, ман дар толорҳои Аврупо, Амрико тамрин намудам, дар толори Муҳаммад Алӣ будам ва мушоҳида мекардам, ки тамрини онҳо аз мо ягон дигаргунӣ надорад. Чӣ усулҳое, ки дар Тоҷикистон омӯхтам, дар тамринҳо бо ҳамон усулҳо кор мекардам. Ягона пешниҳоди ман барои варзишгарони кишвар ин аст, ки ба худ бовар дошта бошанд. Вақте боварӣ ҳосил шуд, инсон ба тамоми мақсадҳояш мерасад.

- Барои роҳхат гирифтан ба Олимпиадаи Токио-2020 чӣ нақшаҳо доред?

- Дар шаҳри Остонаи Қазоқистон қарор дорам. Дар ин ҷо бо Мураббии шоистаи Қазоқистон Сагатбек Мӯсахонов тамрин намуда, ба шаҳри Монрои иёлоти Луизианаи Амрико рафта, дар чемпионати ҷаҳон аз рӯи равияи WBC (World Boxing Council), ки тибқи нақша 23 сентябр дар Амрико байни ҷавонон баргузор мегардад, ният дорам дар ин мусобиқаи бонуфуз шарафи кишварамонро ҳимоя намоям. Баъди мусобиқаи мазкур моҳи декабри соли 2017 тамринҳоро ба бокси олимпӣ шуруъ мекунам ва кӯшиш менамоям, ки роҳхати Бозиҳои олимпии Токио-2020-ро ба даст орам.

Мехостам аз Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Ширкати “Каёнуш” барои дастгириашон изҳори сипос намоям, чунки барои муваффақ шуданам хеле мусоидат ва кӯмак кардаанд.



Шарҳи ҳол

Меҳрубон Сангинов 3 феврали соли 1996 дар шаҳри Душанбе таваллуд шуда, аз соли 2008 зери роҳбарии Мураббии шоистаи Тоҷикистон оид ба бокс, Устоди варзиши СССР Парвиз Ахмедов тамрин менамояд. Соли 2011 чемпиони Тоҷикистон оид ба бокс байни наврасон шудааст. Аз соли 2014 то имрӯз машқу тамринаҳояшро зери роҳбарии Мураббии шоистаи Қазоқистон Сагатбек Мӯсахонов идома медиҳад. Ин варзишгари тоҷик дар давоми фаъолияташ соҳиби 18 ҷоиза буда, се маротиба байни наврасон қаҳрамони кишвар оид ба бокс мебошад. Соли 2015 бо унвони Устоди варзиши Тоҷикистон сарфароз шудааст.

Шаҳбози АСОМИДДИН, “ҶТ”