Тайи ду рӯз - 12-13-уми май дар шаҳри Гулистони вилояти Суғд мусобиқаи минтақавӣ оид ба футзал барои дарёфти “Ҷоизаи Шурои иттифоқҳои касабаи Осиёи Марказӣ” баргузор гардид.

Дар ин бора сомонаи расмии Федератсияи иттифоқҳои касабаи мустақили Тоҷикистон иттилоъ дод.

Мувофиқи иттилои манбаъ дар мусобиқаи мазкур дастаҳо аз давлатҳои Тоҷикистон, Узбекистон, Қазоқистон ва Қирғизистон иштирок карданд.

Дар рафти рақобатҳо дастаи футзали Тоҷикистон ва Узбекистон ду ғалабаӣ ба даст оварда, ба финали мусобиқа роҳ ёфтанд. Дар марҳилаи финалии мусобиқа ин ду даста байни ҳам барои ба даст овардани ҷом ва нишонҳои заррин байни ҳам сабқат намуданд. Дастаи футзали Федератсияи иттифоқҳои касабаи Узбекистон дар рақобати мазкур бо ҳисоби 2 бар 1 дастаи футзали Федератсияи иттифоқҳои касабаи мустақили Тоҷикистонро шикаст дода, ҳамин тавр ҷом ва медали тиллоро ба даст оварданд. Дастаи Тоҷикистон бошад ба гирифтани медали нуқраи ин чемпионат даст ёфт. Аз рӯи ҷадвал дастаи Қазоқистон ҷои сеюм ва Қирғизистон ҷои чорумро ишғол намуданд.