17-уми август дар 5-ум Бозиҳои ҳамбастагии исломӣ дар шаҳри Қунияи Туркия тими ҷудои Тоҷикистон дар сабқати даставӣ соҳиби медали биринҷӣ гардида, шумораи медалҳои ҳайати олимпии Тоҷикистон ба 8 адад расид.

Дар ин бора Кумитаи миллии олимпии Тоҷикистон хабар додааст.

Бино ба иттилои манбаъ дар қувваозмоиҳои даставӣ тими ҷудои Тоҷикистон нахуст бо тими ҷудои Узбекистон бояд сабқат мекард, вале ҷудочиёни узбекистонӣ аз рақобат даст кашиданд. Дар чорякфинал ҷудочиёни мо бар дастаи Сенегал ғолиб омаданд, вале дар нимфинал аз тими Озарбойҷон шикаст хурданд. Сипас дар қувваозмоӣ барои ҷои сеюм дастаи Қазоқистонро мағлуб намуданд.

Ёдрас мешавем, ки қаблан дар варзиши сабук варзишгари мо Илдар Аҳмадиев, дар пара-тенниси рӯи миз Екатерина Ишенко, дар ҷудо Комроншоҳ Устопириён медали нуқра ва дар гуштини юнонӣ-римӣ Асламҷон Азизов дар вазни -55кг, Фирӯз Мирзораҷабов дар вазни -63кг, дар ҷудо Шодмон Ризоев дар вазни -81кг ва Абубакри Акобир дар вазни -100кг медали биринҷӣ ба даст оварда буданд.

Тоҷикистон бо 3 медали нуқра ва 5 медали биринҷӣ миёни 56 кишвари иштирокчӣ дар ҷои 29-ум қарор дорад.