ВАРЗИШ
Душанбе 20 Май 2019 07:17
5882
Пешрафти дилхоҳ соҳа ба нафароне вобастааст, ки сарсупурдаи он ҳастанду барои расидан ба муваффақиятҳои назаррас доим дар талошанду ҷустуҷӯ. Дар ин радиф соҳаи варзиш низ истисно набуда, солҳои охир дар тамоми намудҳои он дастовардҳо ба назар мерасанд, ки бешак боиси ифтихор аст.

Мирзо Шамсиев, Мураббии шоистаи Ҷумҳурии Тоҷикистон дар риштаи бокс аз нафароне дониста мешавад, ки дар тӯли фаъолияти мураббигии хеш тавонистааст, якчанд шогирдонеро тарбияву ба камол расонад. Онҳо дар тамоми мусобиқаҳои сатҳи ҷаҳонӣ аз риштаи бокс ҳамеша мақомҳои ифтихориро ба даст меоранду Парчами кишварро баланд мебардоранд.

Аз ҷумла, шогирдони муваффақи ин мураббии кордидаву кордон дар риштаи бокс Мавзуна Чориева, Анвар Юнусов ва Баҳодур Усмонов мебошанд, ки ҳар се қаҳрамони Осиёанд. Гарчанде дар риштаи бокс тӯли ҳашт соли охир, аниқтараш аз соли 2011 инҷониб ба ягон муштзани тоҷик имкони ба даст овардани унвони қаҳрамони Осиё насиб намегардид, билохира дар натиҷаи тавсияҳои пай дар пайи Мирзо Шамсиев соли 2019 Баҳодур Усмонов муштзани тоҷик тавонист дар Чемпионати Осиё, ки аз 20-ум то 26-уми апрел дар шаҳри Бангкоки Тайланд доир гардид, нишони тиллои ин мусобиқаро ба даст орад.
 
Баҳодур Усмонов зимни  рақобатҳо дар Чемпионати Осиё то ба қувваозмоии ниҳоӣ расидан, ба тамоми ҳарифонаш дастболо гардида, дар вазни 64 кило дар даври ниҳоӣ бар Обада Ал-Касбе варзишгар аз Урдун дастболо шуда, нишони тиллои ин мусобиқаи қуравиро ба гардан овехта, унвони қаҳрамонии Осиёро ба даст овард. 

Зимни суҳбат аз Мирзо Шамсиев, мураббии  Баҳодур Усмонов чун доир ба дастовардҳои дигари варзишгар пурсон гардидем, гуфт:

“Баҳодур Усмонов варзишгари муваффақ дар риштаи бокс мебошад. Ӯ қобилияти хуби  варзишӣ дошта, қаҳрамони чандинкаратаи бокс дар кишвар аст. Аз ҷумла, тайи ду соли охир дар мусобиқаҳои сатҳи ҷаҳонӣ ба натиҷаҳои назаррас дастёб гардида, соли 2018 дар Бозиҳои осиёӣ дар Индонезия ду қувваозмоӣ анҷом додааст. Баҳодур моҳи феврали соли ҷорӣ дар мусобиқаи байналмилалӣ, ки ба хотираи қаҳрамони Иттиҳоди Шӯравӣ Дуйшен Шопоков дар шаҳри Бишкеки Қирғизистон доир гардид, ҷойи аввалро ба даст оварда, парчами ватанро баланд бардошт”. 

Пас аз қаҳрамони Осиё гардидани Баҳодур Усмонов, суҳбати Мирзо Шамсиев дар радиои “Озодӣ” нашр гардида, дар пайи он сару садоҳои зиёде атрофи дастгирии молиявӣ нагардидани варзишгар Баҳодур Усмонов ба миён омаданд. Бе мувофиқа нашр гардидани суҳбати мазкурро Мирзо Шамсиев, Мураббии шоистаи кишвар боиси таъсиргузории он ба обрў, саломатӣ ва ҳолати равонияш арзёбӣ карда, вобаста ба ҳолати бамиёномада, изҳороти худро дар Агентии иттилоотии АМИТ “Ховар” нашр намуд, ки дар он омадааст:
   
“Тӯли чиҳил сол мешавад, ки ба ҳайси мураббӣ дар риштаи бокс ба шогирдон дарс медиҳаму нозукиҳои ин риштаи варзишро ба онҳо меомӯзонам. Дар тӯли фаъолияти мураббигиям се шогирдам- Мавзуна Чориева соли 2010, Анвар Юнусов соли 2011 ва Баҳодур Усмонов соли 2019 ба гирифтани унвони қаҳрамони Осиё дар риштаи бокс мушарраф шудаанд. Ман, ки мутахассиси соҳаи худ ҳастам, аз талабот, қонун ва низоми он бархурдорам ва ҳамеша кӯшиш мекунам дар доираи он фаъолияти худро роҳзандозӣ намуда, саҳми худро дар пешрафти ҷамъият гузорам. Аммо ба ҳолате, ки суҳбати телефонии худро пас аз интишор гардидан дар радиои “Озодӣ” фаҳмидам, ки бо ман Нарзулло Латипов ҳамсуҳбат шудаасту барои истифода онро қарор додааст, зид мебошам. Чунки интишори чунин як маълумот бе мувофиқаи ман ба обрў, саломатӣ ва ҳолати равонии ман таъсиргузор мебошад. Ман ҳамчун мураббӣ ба ВАО – и ҷумҳурӣ, ҳаводорону дӯстдорони варзиш ва шогирдони алоқамандони ин намуди варзиш изҳор карда, мегӯям, ки ҳолати воқеии кор  чунин аст. “Аз 30 март то 3 апрели соли 2019 дар шаҳри Душанбе Чемпионати Ҷумҳурии Тоҷикистон баргузор гардид. Дар  он Баҳодур Усмонов ба гирифтани мақоми аввал мушарраф гардида, барои идомаи рақобатҳо дар сатҳи байналмилалӣ узви  дастаи мунтахаби Ҷумҳурии Тоҷикистон оид ба бокс гардид. Ман мураббии ин варзишгар дар якҷоягӣ бо Федератсияи бокси кишвар ҷиҳати иштироки Баҳодур Усмонов дар Чемпионати Осиё ҳуҷҷатҳоро барои дастгирии молиявӣ  12 апрели соли 2019 ба унвонии  Кумитаи кор бо ҷавонон ва варзиш пешниҳод намудем. Новобаста аз дер пешниҳод кардани маводи пеш аз сафар аз ҷониби ман, 15 апрели соли 2019, фармоиши раиси Кумитаи кор бо ҷавонон ва варзиш, яъне ду рӯз пас аз дархости ман, ки ҳолати бисёр фаврии дастгирии дархост мебошад, ба имзо расида, барои ин сафар маблағи 16 952 сомонӣ ҷудо гардид, ки пурра хароҷоти сафарро мепӯшонад. Ман  аз ин маълумот хабардор будам ва медонистам, ки Кумита маблағгузории пурраи сафарро пардохт мекунад. Ҳамзамон аз рӯи таҷриба маълум менамоям, ки новобаста аз дер пешниҳод кардани маълумоти сафар аз ҷониби ман, роҳбарияти кумита дар доираи сиёсати варзишпарваронаи Президенти Тоҷикистон муҳтарам Эмомалӣ Раҳмон ҷиҳати сафарбарии варзишгарон ба мусобиқаҳои байналмилалӣ аз ҳисоби маблағҳои буҷавӣ ва муаррифии кишвар дар арсаи байналмилалӣ Баҳодур Усмоновро дастгирӣ намуда, маблағ ҷудо намуд. Маблағ  ҷудо шудааст, кумита дастгирӣ намудааст ва аз буҷети давлат маблағи 16 952 сомонӣ барои пўшонидани хароҷот пурра басанда мебошад. Бо дарназардошти дер муроҷиат карданамон маблағи ҷудогардида, бо пешниҳоди ҳисоботи молиявии сафар пурра пардохт мегардад, ки ин тартиб низ аз ҷониби мо халалдор шуда, то ҳол ба унвони кумита ҳисоботи молиявиро пешниҳод накардем. Ман ҳамчун мурраббии мактаби варзишӣ аз ин дастгирии Пешвои муаззами миллат ва Ҳукумати ҷумҳурӣ бори дигар изҳори сипос ва миннатдорӣ менамоям. Хоҳишмандам   нисбат ба рўзноманигор Назрулло Латипов дар асоси моддаи 23 Конститутсияи Ҷумҳурии Тоҷикистон:

“Маҳрамияти мукотиба, суҳбатҳои телефонӣ, муросилот ва мухобироти шахс таъмин карда мешавад. Дар бораи ҳаёти шахсии инсон бе розигии ў ҷамъ намудан, нигоҳ доштан, истифода кардан ва паҳн кардани маълумот манъ аст” ва моддаи 29 (Уҳдадориҳои журналист)- и Қонуни ҶТ “Дар бораи матбуоти даврӣ ва дигар воситаҳои ахбори омма”, ки дар он ҷо омадааст: “пеш аз нашр маводи мусоҳибаи омодакардаашро бо сарчашмаи он мувофиқа намояд”, аз тарафи мақомоти дахлдор  чораҷўӣ карда шавад”.

Мураббиён аз Баҳодур Усмонов дар оянда интизориҳои зиёд доранд. Зеро фатҳи қуллаи бокс дар Чемпионати Осиё маҳорат ва таҷрибаи варзишии Баҳодур Усмоновро зиёд намуда, аз ӯ дар Чемпионати ҷаҳон оид ба бокс натиҷаҳои назаррасро интизор шудан мумкин аст. 

 “Аз 7-ум то 21-уми сентябри имсол дар шаҳри Екатеринбурги Русия Чемпионати ҷаҳон оид ба бокс мегузарад. Мо аллакай машқҳоро бо варзишгарон оғоз намудем. Баҳодур пас аз ду рӯзи баргаштанаш аз Чемпионати Осиё ба машқҳо ҳозир шуда, айни ҳол тамрин намуда истодааст. Ҳоло мо барои иштирок дар Чемпионати ҷаҳон омодагӣ дида истодаем. Бо натиҷаи хуб нишон додан дар ин чемпионати сатҳи ҷаҳонӣ мо метавонем, роҳхати Бозиҳои олимпии Токио-2020-ро ба даст орем”, - иброз дошт Мирзо Шамсиев. 

Ба таъкиди ӯ намуди варзиши бокс дар кишвар рӯ ба рушд буда, ҳамаи ин натиҷаи дастгириҳои Ҳукумату давлат мебошад. Барои варзишгарон имрӯз тамоми шароитҳои зарурӣ фароҳам оварда шудааст. Агар ҷавонон хоҳиши варзишгар шуданро дошта бошанд, пас онҳо метавонанд, ба варзиш машғул шаванд ва ба ин васила парчами меҳанро дар сатҳи байналмилалӣ баланд бардоранд. Дар ин ҷода танҳо бояд талошу кӯшиш кард, то ба дастовардҳои варзишӣ ноил гардид. 


Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
29 30 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2

Май 2019 c.